Türkiyə Çin vətəndaşları üçün viza rejimini ləğv etdi. "Rəsmi Qəzet"də dərc olunan prezident sərəncamına əsasən, Türkiyə ümumvətəndaş pasportuna malik olan Çin vətəndaşlarına rəsmi olaraq vizasız səyahət hüququ verib.
Prezident Rəcəb Tayyib Ərdoğan tərəfindən imzalanan sərəncama əsasən, Türkiyəyə 90 günədək müddətə səfər etmək istəyən Çin vətəndaşları üçün 2026-cı il yanvarın 2-dən etibarən viza rejimi ləğv edilir.
Bu qərar iki ölkə arasında turizm və ticarət sahələrində əməkdaşlığın genişləndirilməsinə xidmət edir. Türkiyənin rəsmi statistika məlumatlarına görə, 2024-cü ildə ölkəyə təxminən 410.000 çinli turist səyahət edib, bu da əvvəlki illə müqayisədə 65,1 faiz artım deməkdir.
Çinin Ankaradakı səfiri Jianq Xuebin Yeni il münasibətilə etdiyi paylaşımda viza rejimi ilə bağlı qərardan məmnunluğunu ifadə edib. Səfir deyib: ‘‘Ürəkdən inanıram ki, bu mühüm addım insanlar arasındakı qarşılıqlı əlaqəni daha da gücləndirəcək və iki ölkə arasındakı uzunmüddətli dostluğu dərinləşdirəcək’’.
Səfir Jianq Xuebin Türkiyənin qədim sivilizasiyalarına və təbii gözəlliklərinə heyranlığını bildirərək, ölkələr arasında mədəniyyət və turizm əlaqələrinin getdikcə gücləndiyini vurğulayıb.
Rəsmilər vizasız rejimin çinli turistlərin sayını daha da artıracağını, yerli iqtisadiyyata əhəmiyyətli töhfə verəcəyini və ikitərəfli münasibətləri möhkəmləndirəcəyini gözləyirlər.
.
