Prezident Rəcəb Tayyib Ərdoğan ilə Fransa Prezidenti Emmanuel Makron arasında aprelin 11-də telefon danışığı baş tutub. Bu barədə Türkiyə Prezident Administrasiyasının İctimaiyyətlə Əlaqələr İdarəsi tərəfindən məlumat verilib. Bildirilir ki, tərəflər ölkələr arasındakı münasibətləri, regional və qlobal inkişafları müzakirə ediblər.
Məlumata əsasən, ölkə başçısı R.T.Ərdoğan xüsusilə müdafiə sənayesi başda olmaqla bütün sahələrdə əməkdaşlığın inkişaf etdirilməsinin hər iki ölkə üçün faydalı olacağını bildirib.
Prezident R.T.Ərdoğan qeyd edib ki, İrana qarşı hücumlarla başlayan proses qlobal mühitə mənfi təsir göstərib. Onun sözlərinə görə, Türkiyə və digər ölkələrin dəstəklədiyi diplomatik səylər atəşkəsin əldə olunmasında mühüm rol oynayıb.
Atəşkəsin qorunmasının vacibliyini vurğulayan R.T.Ərdoğan, xüsusilə Livana yönəlmiş hücumlar fonunda “atəşkəs prosesini pozacaq” addımlara yol verilməməsi ilə bağlı fikir bildirib.
Dövlət başçısı R.T.Ərdoğan qeyd edib ki, rəsmi Ankara sabitliyin qorunmasına yönəlmiş səylərə töhfə verməyə davam edəcək.
Prezident R.T.Ərdoğan həmçinin Qəzza üzrə sülh planının ikinci mərhələsinin başlanmasının vacibliyinə diqqət çəkərək əldə olunan irəliləyişin əldən buraxılmaması gərəkdiyini vurğulayıb.
Liderlər eyni zamanda Hörmüz boğazında azad gəmiçiliyin beynəlxalq hüquq əsasında təmin olunması, Suriyadakı vəziyyət, Qafqazda sülhə dəstək və Ukrayna ilə Rusiya arasında davamlı sülh üçün danışıqların yenidən canlandırılması istiqamətində səyləri də müzakirə ediblər.
