Türkiyə Xarici İşlər Nazirliyi İsrail Xarici İşlər Nazirliyinin Prezident Rəcəb Tayyib Ərdoğanı hədəf alan bəyanatına kəskin reaksiya verib.

Nazirliyin yaydığı bəyanatda deyilir:

"İsrail Xarici İşlər Nazirliyinin mövqeyində möhtərəm Prezidentimizi hədəf alan yalan və böhtanlar yer alıb. Bu ifadələr B.Netanyahu başda olmaqla, İsrail hökumətində təmsil olunan cinayətkarların qorxaq və çürümüş təfəkkürünü əks etdirir.

Netanyahu və onun cinayət şəbəkəsi Qəzzada soyqırım törədərək bütün İsrail xalqına tarixi bir rüsvayçılıq yaşadıb. Onlar, eyni zamanda, müasir Yaxın Şərq tarixində görünməmiş bir işğal siyasəti aparırlar. Buna görə də, həmin qüvvələr regionda və dünyada sabitsizliyin başlıca səbəbkarlarıdır. Artıq bu şəxslərin malik olduğu toxunulmazlıq həm hüquqi, həm də siyasi baxımdan aradan qalxır.

İsrail qurumları Qebbelsin təbliğat aparatına oxşar şəkildə fəaliyyət göstərir. Lakin onların bu cəhdləri artıq nəticə vermir. Beynəlxalq ictimaiyyət B.Netanyahunun rəhbərlik etdiyi hökumətin yalanlarına inanmır.

Türkiyə möhtərəm Prezidentimiz R.T.Ərdoğanın liderliyi ilə B.Netanyahu dövründə törədilən cinayətlərə qarşı hər zaman dürüst və qətiyyətli mövqe nümayiş etdirib. Ölkəmiz bundan sonra da həqiqətləri müdafiə etməyə və onları dilə gətirməyə davam edəcək".