İndoneziyanın Qərbi Yava əyalətinin Bekasi şəhərində baş vermiş ağır qatar qəzası nəticəsində ölənlərin sayı 14 nəfərə çatıb, 84 nəfər isə müxtəlif dərəcəli xəsarətlər alıb. "Antara" xəbər agentliyinin məlumatına görə, hadisə aprelin 27-də qeydə alınıb.

Dövlət dəmir yolu operatoru "PT Kereta Api Indonesia"nın (KAI) rəsmiləri onlarla yaralı sərnişinin müxtəlif xəstəxanalarda müalicə olunduğunu bildiriblər. "Jakarta Globe" qəzetinin məlumatına görə, KAI sözçüsü Franoto Vibovo hadisənin Bulak Kapal dəmir yolu keçidində bir taksinin elektrikli şəhərətrafı qatarla toqquşması nəticəsində başladığını qeyd edib.

İlkin toqquşmadan sonra şəhərətrafı qatar dayanıb və qısa müddət sonra eyni xətt üzrə hərəkət edən uzaqmənzilli qatar dayanmış vaqonlara çırpılıb. Milli Axtarış və Xilasetmə Agentliyi (Basarnas) daxil olmaqla bütün təcili yardım qrupları gecə boyu dağıntılar altında qalan və ağır xəsarət alan sərnişinlərin təxliyəsi üçün iş aparıblar.

Rəsmi qurumlar qurbanların bütün tibbi və dəfn xərclərinin dövlət tərəfindən ödəniləcəyini bildiriblər.

Hazırda hadisə yerində qatarların hərəkəti qismən məhdudlaşdırılıb. İstintaq qrupları qəzanın dəqiq səbəblərini araşdırır. İndoneziya nəqliyyat orqanları dağıntıların aradan qaldırılması və xilasetmə əməliyyatlarının davam etdiyini diqqətə çatdırıblar.