İran Milli Təhlükəsizlik Şurasının sədri Əli Laricani martın 4-də verdiyi açıqlamada fevralın 28-də başlayan və hazırda da davam edən müharibə zamanı 500-dən çox ABŞ hərbçisinin öldürüldüyünü iddia edib.
Ə.Laricani “X” platformasında paylaşdığı mesajda ABŞ prezidenti Donald Trampın İsrailin Baş naziri Benyamin Netanyahunun “məsuliyyətsiz davranışlarına” aldandığını bildirərək onu “Amerika xalqını İranla ədalətsiz müharibəyə sürükləməkdə” ittiham edib.
Ə.Laricani etdiyi paylaşımda yazıb: “İndi hesabat aparılmalıdır; cəmi son bir neçə gündə 500-dən çox ABŞ hərbçisi ölüb. Belə olan halda hələ də (Əvvəlcə Amerika) gəlir, yoxsa İsrail?”
ABŞ Müdafiə Nazirliyi isə fevralın 28-dən bu yana təkcə altı amerikalı hərbçinin öldüyünü açıqlayıb. Pentaqonun məlumatına görə, ölən hərbçilərdən dördü Küveytdə həyatını itirib.
Daha əvvəl İranın Ali dini lideri Əli Xameneinin baş müşaviri olmuş və hazırda İran Milli Təhlükəsizlik Şurasına rəhbərlik edən Ə.Laricani üstüörtülü şəkildə döyüşlərin davam edəcəyini bildirərək deyib: “İmam Ə.Xameneinin şəhid edilməsi sizə ağır bədəl ödədəcək. Allahın izni ilə.”
Xatırladaq ki, tərəflər arası müharibə fevralın 28-də İrana qarşı həyata keçirilən ABŞ–İsrail birgə hücumu ilə başlayıb. Həmin hücum nəticəsində İranın Ali dini lideri Əli Xamenei ilə yanaşı, 2025-ci ilin iyununda baş verən müharibə zamanı sələfləri İsrail tərəfindən öldürüldükdən sonra vəzifəyə gəlmiş bir sıra yüksək rütbəli hərbi komandirlər də həlak olub.
Hökumətin hesablamalarına görə, indiyədək davam edən dörd günlük qarşıdurmalar nəticəsində təxminən 1.050 iranlı həyatını itirib. Bu rəqəmə İranın cənubundakı Minab şəhərində öldürülən və ölkədə böyük narazılıq doğuran 165 məktəbli uşaq da daxildir.
Qeyd edək ki, Ə.Xamenei Tehranın mərkəzində yerləşən iqamətgahında həyat yoldaşı, qızı, gəlini, kürəkəni və nəvələri də daxil olmaqla ailə üzvləri ilə birlikdə hədəf alınıb. İran rəhbərliyi Ə.Xameneinin öldürülməsinə cavab olaraq sərt qisas andı içərək Yaxın Şərqdə yerləşən İsrail və ABŞ hərbi bazalarına raket və pilotsuz uçuş aparatları ilə hücumlar həyata keçirməyə başlayıb.
Ə.Laricani martın 2-də verdiyi açıqlamada İranın “özünü uzunmüddətli müharibəyə hazırladığını” bildirib. O həmçinin müharibə başlamazdan əvvəl tərəflər arasında dolayı nüvə danışıqlarında vasitəçilik edən Oman xarici işlər naziri Bədr əl-Busaidi tərəfindən irəli sürülmüş ABŞ ilə danışıqlar təklifini də rədd edib.
