Amerika Birləşmiş Ştatları və Çin bazar ertəsi günü maliyyə bazarlarını sarsıdan və qlobal iqtisadi narahatlığını artıran ticarət müharibəsini aradan qaldırmaq məqsədilə 90 gün ərzində qarşılıqlı ticarət kəsirini azaltmaq barədə razılığa gəliblər.

Dünyanın iki ən böyük iqtisadiyyatına sahib olan ölkələr, danışıqlardan sonra üçrəqəmli tarifləri ikirəqəmli səviyyəyə endirmək və danışıqları davam etdirmək barədə birgə bəyanat yayıblar.

ABŞ Maliyyə Naziri Skot Bessent həftə sonu Çin Baş nazirinin müavini He Lifenq və beynəlxalq ticarət nümayəndəsi Li Çenqanq ilə aparılan danışıqları "məhsuldar" və "əhəmiyyətli" adlandırıb, həmçinin hər iki tərəfin bir-birinə böyük hörmət göstərdiyini vurğulayıb.

Keçən ay ABŞ prezidenti Donald Tramp Çindən idxal olunan məhsullara 145 faiz rüsum tətbiq etmişdi. Rəsmi Pekin də bu addıma cavab olaraq ABŞ məhsullarına 125 faiz rüsum qoymuşdu. Bessent iki tərəfin ABŞ tariflərini 30 faizə, Çin tariflərini isə 10 faizə endirərək tarifləri 115 faiz azaltmağa razılaşdıqlarını açıqlayıb.

Birgə bəyanatda qeyd olunur ki, hər iki tərəf iqtisadi və ticarət əlaqələri üzrə müzakirələrin davam etdirilməsi üçün mexanizmin yaradılmasında razılığa gəliblər. Çin danışıqlarda əldə edilən irəliləyişi alqışlayıb.

Çinin Ticarət Nazirliyi isə bildirib ki, bu addım hər iki ölkənin və dünyanın ortaq maraqlarına xidmət edir.

Ümumdünya Ticarət Təşkilatının rəhbəri Nqozi Okonjo-İveala danışıqları "gələcək üçün ümidverici" və "vacib addım" adlandırıb.

"Mövcud qlobal gərginlik şəraitində bu irəliləyiş təkcə ABŞ və Çin üçün deyil, həm də dünya, o cümlədən ən həssas iqtisadiyyatlar üçün vacibdir", – deyə Okonjo-İveala vurğulayıb.

Donald Tramp Birləşmiş Millətlər Təşkilatının Cenevrədəki mənzil-qərargahında keçirilən danışıqlardan əvvəl "Çin məhsullarına 80% rüsum tətbiqi düzgün addımdır" demişdi.

Lakin Ağ Evin mətbuat katibi Karolin Lavit daha sonra ABŞ-ın tarifləri birtərəfli qaydada aşağı salmayacağını və Çinin güzəştə getməli olduğunu söyləmişdi.