Pohang yaxınlığında doqquz günlük minalara qarşı müharibə təlimi Cənubi Koreya və ABŞ-ın birgə donanma müdafiəsi taktikasını təkmilləşdirib.

Cənubi Koreya və ABŞ qüvvələri cənub-şərq sahillərində yerləşən Pohang şəhəri yaxınlığındakı sularda minalara qarşı mübarizə imkanlarını təkmilləşdirmək məqsədi ilə birgə hərbi dəniz təlimi keçirib.

"Yonhap" xəbər agentliyinin Cənubi Koreyanın Hərbi Dəniz Qüvvələrinə istinadən verdiyi məlumata görə, aprelin 15-də başa çatan doqquz günlük təlimlərə hər iki tərəfdən 10 döyüş gəmisi və üç helikopter, o cümlədən Cənubi Koreyanın "Nampo MLS-II" minaatan gəmisi və ABŞ-ın "USS Warrior" (MCM-10) mina əleyhinə gəmisi iştirak edib.

Cənubi Koreya Hərbi Dəniz Qüvvələrinin 52-ci Mina Donanmasının komandiri, kapitan Li Taeq-son “Praktiki minalarla mübarizə təlimini davam etdirməklə, fövqəladə hallar zamanı əsas limanlarımızı və dəniz yollarımızı qorumaq qabiliyyətimizi gücləndirəcəyik” deyib.

Təlim 2014-cü ildə başlanandan bu yana iki ölkə tərəfindən həyata keçirilən sayca 10-cu hərbi dəniz mina əleyhinə döyüş təlimi olub.

Cənubi Koreya və ABŞ qüvvələri həmçinin aprelin 15-də Koreya yarımadası üzərində ən azı bir B-1B bombardmançısının iştirak etdiyi birgə hava təlimləri keçirib ki, bu da fevraldan bəri ikinci dəfədir.

Keçən həftə Birləşmiş Ştatlar və Cənubi Koreya həm müharibə zamanı, həm də sülh dövründə dənizdə birgə xilasetmə və bu sahədə imkanları təkmilləşdirmək üçün Çanqvon yaxınlığındakı sularda təlim keçirib.