Türkiyə Ailə və Sosial Xidmətlər Nazirliyi qadınlara qarşı zorakılığı qadının fiziki, cinsi, psixoloji və iqtisadi sahələrdə hüquqlarına qəsdən zərər yetirən davranışlar kimi xarakterizə edir. Bu cür zorakılıq aktları evdə, iş yerində və ya cəmiyyətin istənilən yerində baş verə bilər.
Qadınlara qarşı zorakılıq onların yaşamaq hüququnu, şəxsi təhlükəsizliyini, fiziki və psixoloji bütövlüyünü, həmçinin iqtisadi və sosial həyatda iştirak hüquqlarını pozur.
Ailə və Sosial Xidmətlər Nazirliyi yanında fəaliyyət göstərən Qadınların Statusu Baş İdarəsi Türkiyədə qadınlara qarşı zorakılıqla mübarizə aparmaq üçün milli siyasət və strategiyaların əlaqələndirilməsinə cavabdehdir. Nazirliyin ixtisaslaşmış institusional xidmət bölmələri mövcuddur.
Zorakılığın qarşısının alınması və monitorinq mərkəzləri
Zorakılığın qarşısının alınması və monitorinq mərkəzləri zorakılığı önləmək və lazımi tədbirləri effektiv şəkildə həyata keçirmək üçün monitorinq və dəstək xidmətləri göstərən sosial təşkilatlar kimi fəaliyyət göstərir. Bu mərkəzlər psixososial dəstək, hüquqi yardım, təhsil, səhiyyə və iqtisadi dəstək göstərməklə yanaşı, zorakılıqla üzləşən qadınlara sığınacaqlarda yerləşmə imkanı da təqdim edirlər. Hal-hazırda bu mərkəzlər 81 vilayətdə, 86 təşkilatla fəaliyyət göstərir.
Qadınlar üçün sığınacaqlar
Qadın sığınacaqları zorakılığa məruz qalmış qadınlara və onların uşaqlarına xidmət göstərməyi hədəfləyən sosial müəssisələrdir. Bu müəssisələr sığınacaq təmin etməklə yanaşı, qadınların səlahiyyətləndirilmə proseslərini dəstəkləyərək onların psixososial və iqtisadi problemlərinin həllinə kömək edir. Nazirlik yanında fəaliyyət göstərən 112 qadın sığınacağı var. Bu xidmətlərdən yararlanmaq istəyənlər zorakılığın qarşısının alınması və monitorinq mərkəzləri vasitəsilə müraciət edə bilərlər.
Zorakılıqla Mübarizə üzrə Sosial Xidmət Mərkəzləri
Nazirlik bildirir ki, rayon səviyyəsində fəaliyyət göstərən zorakılığın qarşısının alınması və monitorinq mərkəzləri ilə koordinasiyalı şəkildə bu mərkəzlər zorakılıq qurbanlarına rəhbərlik və məsləhət xidmətləri göstərir. Ölkə daxilində belə 432 məntəqə fəaliyyət göstərir. Məlumatda həmçinin qeyd olunur ki, qurbanlara dəstək sistemləri qadınlara qarşı zorakılıqla mübarizədə ərizələrə baxış və təcili müdaxiləyə çıxış imkanı təmin edir.
“Alo 183” qadınlara qarşı zorakılıq üzrə qaynar xətt
183 nömrəli qaynar xətt zorakılığa məruz qalmış qadınlara 24 saat, həftənin 7 günü təcili yardım və məsləhət xidmətləri təqdim edir.
“Qadınlara təcili dəstək” (KADES) mobil tətbiqi
KADES yalnız qadınlar üçün nəzərdə tutulmuş və smartfonlara yüklənə bilən mobil tətbiqdir. Tətbiqdəki funksiyasını aktiv etdikdən sonra ən yaxın hüquq-mühafizə orqanı əməkdaşı zorakılıqla üzləşən qurbanın yerləşdiyi yerə tez bir zamanda göndərilir.
