Türkiyə Prezidenti Rəcəb Tayyib Ərdoğan Ankaraya rəsmi səfər edən Yeni Zelandiyanın Baş qubernatoru Sindi Kironu qəbul edib. Türkiyə Prezidenti Administrasiyasının Kommunikasiya İdarəsindən verilən məlumata görə, Prezident İqamətgahında mətbuata qapalı keçirilən görüşdə ikitərəfli münasibətlər, regional və qlobal proseslər ətrafında fikir mübadiləsi aparılıb.

Dövlət başçısı Çanaqqala döyüşlərinin 111-ci ildönümündə baş tutan bu səfərin hər iki ölkənin ortaq tarixi yaddaşı baxımından böyük əhəmiyyət kəsb etdiyini vurğulayıb. R.T.Ərdoğan Türkiyənin Yeni Zelandiya ilə xüsusilə ticarət, müdafiə sənayesi və nəqliyyat sahələrində əməkdaşlığı daha da dərinləşdirmək niyyətində olduğunu diqqətə çatdırıb.

Görüş zamanı Prezident Ərdoğan Yeni Zelandiyanın İslamofobiya ilə mübarizədə nümayiş etdirdiyi prinsipial mövqeyi, eləcə də Fələstin məsələsində "iki dövlətli həll" modelinə verdiyi dəstəyi yüksək qiymətləndirib. O, Yeni Zelandiya tərəfindən Fələstin dövlətinin rəsmən tanınmasının regionda sülhün bərqərar olmasına mühüm töhfə verəcəyini qeyd edib.

Ekoloji məsələlərə də toxunan Ərdoğan Türkiyənin "yaşıl transformasiya" və iqlim dəyişikliyi ilə mübarizə sahəsindəki nailiyyətlərini qeyd edərək Baş Qubernatoru cari ilin noyabrında Antalyada keçiriləcək COP31 BMT İqlim Dəyişikliyi Konfransına dəvət edib.