Türkiyə Xarici İşlər Nazirliyi Suriyanın paytaxtı Dəməşqin Hicaz bölgəsində törədilən və insan tələfatı ilə nəticələnən hücumu kəskin şəkildə pisləyən bəyanat yayıb.

Nazirliyin yaydığı rəsmi açıqlamada hadisə zamanı həyatını itirənlərin ailələrinə dərin hüznlə başsağlığı verilib, yaralılara şəfa dilənib. Bəyanatda həmçinin vurğulanıb ki, Suriyada davamlı sabitlik, təhlükəsizlik və sosial sülhün bərpası istiqamətində əldə olunan irəliləyişləri pozmağa yönəlmiş bu cür cəhdlərə ən doğru cavab, məhz Suriya xalqının öz birlik və həmrəyliyini qoruması olacaqdır. Türkiyənin bu çətin prosesdə Suriya ilə həmrəyliyini bundan sonra da qətiyyətlə davam etdirəcəyi bildirilib.

Qeyd edək ki, Dəməşqin tarixi Hamidiyyə bazarının girişində yerləşən kafilərin birində kustar üsulla hazırlanan partlayıcı qurğunun işə salınması nəticəsində ilkin məlumatlara görə 5 nəfər dünyasını dəyişib, 16 nəfər isə xəsarət alıb. Hadisə ilə bağlı Suriya Daxili İşlər Nazirliyi tərəfindən genişmiqyaslı araşdırmalara başlanılıb.