Türk Dövlətləri Təşkilatı (TDT) kosmonavtika ilə bağlı elm, texnologiya və innovasiya sahəsində əməkdaşlığı gücləndirmək işləri çərçivəsində mühüm beynəlxalq tədbirlərdə “Türk Dünyası Kosmonavtika Günləri” keçirməyi planlaşdırır. Təşkilat həmçinin birgə hazırlanan peykin 2027-ci ildə orbitə buraxılmasını hədəfləyir.
Ən böyük tədbirlərindən olan Beynəlxalq Kosmonavtika Kongresinin (IAC) son illərdə Türk dövlətlərində təşkil edilməsi də diqqət çəkir.
2023-cü ildə Azərbaycanla başlayan bu proses bu il Türkiyə ilə davam edib. 2028-ci ildəki konqres isə Özbəkistanda keçiriləcək.
Üzv dövlətlər TDT-nin qlobal miqyasda tanınmasını artırmaq və birgə təşəbbüsləri təqdim etmək niyyətindədir. Bu məqsədlə mühüm beynəlxalq kosmonavtika sahəsi üzrə tədbirlər çərçivəsində “Türk Dünyası Kosmonavtika Günləri”nin təşkil edilməsi nəzərdə tutulur.
Birgə peyk üçün 2027-ci il hədəfi
Bəyannamədə TDT daxilində birgə hazırlanan ilk “CubeSat” layihəsi – 12U “CubeSat” peyki TDT-SAT-ın istehsal mərhələsinin yekunlaşması yüksək qiymətləndirilib. Bu addım Türk dövlətləri arasındakı texnoloji əməkdaşlıqda mühüm bir mərhələ kimi qiymətləndirilib.
Sınaqların bu ilin sonunadək yekun mərhələyə çatdırılması planlaşdırılır. Peykin isə 2027-ci ilin ikinci yarısında Qazaxıstandakı “Baykonur Kosmik Bazası”ndan orbitə buraxılması nəzərdə tutulur.
Gənclər proqramları və TEKNOFEST
Bəyannamədə Türkiyə Kosmik Agentliyinin (TUA) “Kosmonavtika Tədqiqatçıları Türkiyə Kosmos Düşərgəsi” proqramı mühüm təşəbbüs kimi qeyd olunub. Bu proqram kosmonavtika sahəsində gənc istedadların yetişdirilməsi və Türk dünyası gəncləri arasındakı əlaqələrin möhkəmləndirilməsi baxımından böyük əhəmiyyət kəsb edir.
Proqramın davam etdirilməsi və əhatə dairəsinin genişləndirilməsi hədəflənir. Eyni zamanda "TEKNOFEST" Aviasiya, Kosmonavtika və Texnologiya Festivalı da Türk dünyası gənclərini bir araya gətirən platformalardan biri kimi öne çıxır.
Türkiyə Texnologiya Komandası Vəqfinin (T3 Vəqfi) idarə heyətinin sədri Elvan Kuzucu Hıdır “Anadolu” agentliyinin müxbirinə açıqlama verib. O, TEKNOFEST-in Ankara Bəyannaməsində yer almasını Türk dünyasının elm, texnologiya və innovasiya sahəsindəki birgə gələcək baxışının göstəricisi kimi qiymətləndirdiklərini bildirib.
Elvan Kuzucu Hıdır uşaqların və gənclərin bacarıqlarını erkən yaşda kəşf etmələrini və ideyalarını konkret layihələrə çevirmələrini hədəflədiklərini vurğulayıb.
O, bu fəaliyyətlərlə təkcə gənclərin elmi və texnoloji biliklərini inkişaf etdirməyi nəzərdə tutmadıqlarını qeyd edib. Eyni zamanda təcrübə mübadiləsini, birgə istehsal bacarığını və davamlı əməkdaşlığı gücləndirməyi məqsəd qoyduqlarını diqqətə çatdırıb.
Elvan Kuzucu Hıdır sözlərinə belə davam edib: “İnanırıq ki, Türk dünyasının ən böyük gücü ortaq dəyərlərimiz ətrafında birləşən, xəyal quran və bu xəyallarını konkret layihələrə çevirən gənclərimizdir.”
