Türkiyə Hərbi Hava Qüvvələri 18 sentyabr – 3 oktyabr tarixləri arasında Portuqaliyada keçirilən “NATO Tiger Meet 2025” təlimində fəal iştirak edir. Bu barədə Milli Müdafiə Nazirliyi Türkiyənin “Next” sosial media platforması vasitəsilə məlumat yayıb.
Nazirlik bildirib ki, Türkiyə təlim çərçivəsində üç F-16 qırıcısı və 53 nəfərlik heyətlə təmsil olunur. Keçirilən təlim NATO müttəfiqləri və tərəfdaş ölkələr arasında əməkdaşlıq və həmrəyliyi gücləndirməyi hədəfləyir.
Təlimdə Almaniya, Avstriya, Çexiya, Fransa, Böyük Britaniya, İsveçrə, İtaliya, İspaniya, Polşa, Portuqaliya və Yunanıstan kimi ölkələrin hava qüvvələri ilə yanaşı, NATO bölmələri də iştirak edir.
Türkiyənin bu təlimdə iştirakı NATO daxilində strateji rolunu ön plana çıxarmaqla yanaşı, əməliyyat hazırlığını və müttəfiqlərlə əməkdaşlığa bağlılığını da nümayiş etdirir.
Qeyd edək ki, NATO-nun ən uzunmüddətli çoxmillətli hava təlimlərindən biri hesab edilən “NATO Tiger Meet” taktiki bacarıqların möhkəmləndirilməsi, ortaq prosedurların sınaqdan keçirilməsi və müdafiə əlaqələrinin dərinləşdirilməsi üçün kritik bir platforma kimi qiymətləndirilir. Regional təhlükəsizlik təhdidlərinin dəyişdiyi indiki dövrdə bu təlimin keçirilməsi xüsusi əhəmiyyət daşıyır.
