Oskar mükafatı laureatı və "Başqa torpaq yoxdur" sənədli filminin rejissoru Həmdan Ballal azadlığa buraxıldıqdan sonra qeyri-qanuni israilli məskunlaşanlar tərəfindən məruz qaldığı işgəncə və pis rəftardan danışıb.
Ballal çərşənbə axşamı qeyri-qanuni məskunlaşanlar tərəfindən hücuma məruz qaldığını bildirib. O, azadlığa buraxıldıqdan sonra ''Reuters'' xəbər agentliyinə müsahibə verib.
“Mən sadəcə çöldə gözləyirdim ki, hər hansı bir məskunlaşan və ya əsgər evimə hücum edəcəkmi?”,- deyə Həmdan Ballal qeyd edib.
O, itələndiyini, əsgərlərin ayağa qalxması üçün qışqıraraq silahlarını ona doğrultduqlarını söyləyib. “Bu dəlilikdir. Həmin an ailənizi, uşaqlarınızı təsəvvür edirsiniz və anlayırsınız ki, onları qorumalısınız”,- deyə Həmdan Ballal bildirib.
Onun İsrail təhlükəsizlik qüvvələri tərəfindən saxlanıldığı hadisədən bir müddət əvvəl bir qrup yəhudi Əl-Xəlil yaxınlığındakı Susya kəndində təşkil edilən iftar tədbirinə hücum edib.
Fələstinlilər və bu cür olayları izləyən fəallar polisin və ordunun çox vaxt müdaxilə etmədiyini bildirirlər.
Kinorejissorun həyat yoldaşı Lamia Ballal israilli məskunlaşanların evlərinin ətrafına toplaşdığını və ərinin onların içəri girməsinə mane olmaq üçün bayıra çıxdığını deyib.
“Məskunlaşanlar ona hücum edərək onu döyməyə başladılar, sonra isə onu saxlaydılar’’, - deyə o, Reutersə bildirib.
‘‘Hədəf alındı’’
Fələstinli və israilli rejissorların birgə istehsalı olan "Başqa torpaq yoxdur" filmi bu ilki Oskar mükafatları mərasimində "Ən Yaxşı Sənədli Film" nominasiyasında qalib gəlib.
Ballal bildirib ki, hücumda iştirak edən sakinlərdən biri ona çox tanış olub.
"Bu, ilk dəfə deyildi. O, dəfələrlə evimə hücum edib, həm də mənim bağımda inəklərini otarıb", - deyə Həmdan Ballal vurğulayıb.
H. Ballal ibranicə bilmədiyini, ancaq adını və "Oskar" sözünü eşitdiyini deyib. O, çərşənbə axşamı azadlığa buraxıldıqdan sonra verdiyi müsahibədə "Oskar dediklərini və adınızı dediklərini anlayırsınız", - deyə o, vurğulayıb.
İsrail ordusu əsgərlərin Ballalı döyməsi iddiaları ilə bağlı açıqlama verməyib.
