Türkiyə İsrailin mühasirədə saxladığı və yüzlərlə fələstinlinin ölümünə səbəb olan Qəzzaya son hava hücumlarını kəskin şəkildə pisləyib və həmin hücumları Təl-Əvivin “soyqırım siyasətinin” davamı kimi qiymətləndirib.

Türkiyə Xarici İşlər Nazirliyi verdiyi açıqlamada, bu gərginliyin Netanyahu hökumətinin qəddarlığının yeni mərhələsini təmsil etdiyini bildirib.

Açıqlamada vurğulanıb ki, İsrail beynəlxalq hüququ və ümumbəşəri dəyərləri ən ciddi şəkildə pozaraq bəşəriyyətə meydan oxuyur.

Sülhün bərpası üçün qlobal səylərin davam etdiyi bir vaxtda İsrailin hərəkətləri regional sabitliyi təhdid edir. Bu ölkənin yeni zorakılıq hərəkətlərinə üz tutması qəbuledilməzdir.

Rəsmi Ankara beynəlxalq ictimaiyyəti İsrailin təcavüzünə qarşı qətiyyətli mövqe tutmağa çağırır və dərhal və daimi atəşkəsin, eləcə də Fələstinin Qəzza bölgəsinə humanitar yardımın fasiləsiz çatdırılmasının vacibliyini vurğulayır.

Türkiyə həmçinin Fələstin xalqının ədalətli işinə sarsılmaz dəstəyini bir daha dilə gətirir və regionda sülh və sabitliyə nail olmaq üçün səylərə töhfə vermək öhdəliyini bir daha bəyan edir.