Türkiyənin əsas hava yolu şirkəti “Türk Hava Yolları” (THY) və “AJet” İranda baş verən etirazlarla bağlı bir sıra reyslərin ləğv olunduğunu açıqlayıb.

“Türk Hava Yolları” yanvarın 9-da yaydığı məlumatda bildirib ki, 9-10 yanvar tarixləri üçün Tehrana, Təbrizə və Məşhədə planlaşdırılan ümumilikdə 17 reys ləğv edilib.

Hava yolu şirkətinin verdiyi açıqlamada deyilir: “İranda yaşanan regional məsələlər səbəbindən 9-10 yanvar tarixlərində Tehrana, Təbrizə və Məşhədə planlaşdırılan ümumilikdə 17 reysimiz ləğv edilib”. Şirkət sərnişinlərə uçuşların cari vəziyyətini rəsmi internet saytı vasitəsilə yoxlamağı tövsiyə edib.

Bununla yanaşı, Türkiyənin digər hava yolu şirkəti “AJet” də eyni iki günlük dövrdə İranın paytaxtı Tehrana planlaşdırılan altı reysin ləğv edildiyini açıqlayıb. Şirkət məlumatında bildirilib: “İranda baş verən regional məsələlər səbəbindən 9-10 yanvar tarixlərində Tehrana həyata keçirilməsi planlaşdırılan ümumilikdə 6 reysimiz ləğv edilib”. Aviaşirkət sərnişinlərin dəyişikliklərlə bağlı məlumatlandırıldığını da qeyd edib.

Xatırladaq ki, İranda dekabr ayının sonundan etibarən riyalın kəskin dəyər itirməsi və pisləşən iqtisadi şəraitin yaratdığı etiraz dalğaları baş verib. Etirazlar 28 dekabr tarixində Tehranda başlayıb, daha sonra ölkənin bir çox digər şəhərlərinə yayılıb.

Qeyd edək ki, ölkə rəsmiləri indiyədək baş verən hadisələr zamanı insan tələfatı ilə bağlı rəsmi rəqəmləri açıqlamayıblar.