Regionda hərbi münaqişənin kəskinləşdiyi bir vaxtda Birləşmiş Ştatlar İrandakı hərbi obyekti əhatə edən yeni hücum dalğası həyata keçirib.
ABŞ Mərkəzi Komandanlığı (CENTCOM) "X" sosial şəbəkəsində yaydığı bəyanatda bildirib ki, ABŞ qüvvələri Baş Komandanın göstərişi ilə yerli vaxtla saat 17:30-da İrandakı hərbi hədəflərə zərbələr endirib.
CENTCOM-un məlumatına görə, bu əməliyyatın əsas məqsədi İranın regional sularda mülki dənizçilərə və ticarət gəmilərinə təhlükə törətmək imkanlarını zəiflətməkdir.
Eyni zamanda, Küveyt ordusu İrandan buraxıldığı ehtimal edilən pilotsuz uçuş aparatlarının (PUA) qarşısını almaq üçün hava hücumundan müdafiə sistemlərinin işə salındığını bəyan edib.
Küveyt Baş Qərargahı zərərsizləşdirilən PUA-ların vurulması zamanı partlayış səslərinin eşidildiyini təsdiqləyərək, əhalini aidiyyəti qurumların təhlükəsizlik təlimatlarına əməl etməyə çağırıb.
Bu ilin fevral ayının sonunda ABŞ və İsrail İrana qarşı birgə hərbi əməliyyatlara başladıqdan sonra Yaxın Şərqdə vəziyyət xeyli gərginləşib.
Ötən ay tərəflər Pakistanın vasitəçiliyi ilə münaqişəyə son qoymaq məqsədilə anlaşma memorandumu imzalasalar da, keçən həftə Hörmüz boğazında baş verən insidentlərdən sonra qarşılıqlı hücumlar başlayıb.
ABŞ Müdafiə Nazirliyinin açıqladığı son məlumatlara əsasən, fevralın 28-dən bəri davam edən hərbi əməliyyatlarda 18 amerikalı hərbçi həlak olub, 447 nəfər isə yaralanıb.
