Türkiyə Prezidenti Rəcəb Tayyib Ərdoğan Ramazan bayramı münasibətilə xalqa ünvanladığı videomüraciətdə ölkənin milli təhlükəsizliyi və regional proseslər barədə mühüm bəyanatlar verib. Dövlət başçısı rəsmi Ankaranın hava məkanını qorumaqda qətiyyətli olduğunu və milli təhlükəsizliyi gücləndirməyə davam etdiyini qeyd edib.

Yaxın Şərqdəki vəziyyətə toxunan Ərdoğan Qəzzadakı fələstinlilərin İsrailin atəşkəs pozuntuları və humanitar yardımlara yaratdığı maneələr altında bayramı qarşıladıqlarını qeyd edib. O, işğal və dağıdıcı siyasətin Şərqi Qüds, İordan çayının qərb sahili və Livanın cənubunda geniş yayıldığını bildirib.

Prezident həmçinin fevralın 28-dən etibarən İrana qarşı başlayan hücumların və Tehranın buna raket və PUA-larla verdiyi cavabın regional gərginliyi artırdığını bildirib. Bu vəziyyət fonunda Türkiyənin öz təhlükəsizliyini qorumaq üçün bütün lazımi tədbirləri gördüyünü vurğulayıb.

Ərdoğan qeyd edib ki, Suriyanın şimalındakı məsələlərin razılaşma yolu ilə həlli Türkiyənin təhlükəsizlik qayğılarını aradan qaldırıb və bu ölkənin ərazi bütövlüyünü təmin edib. Məqsəd bölgədə planlaşdırılan qanlı ssenarilərə qarşı bu prosesi uğurla başa çatdırmaqdır.

İqtisadi göstəricilərə də toxunan dövlət başçısı, Türkiyənin ötən il qlobal qeyri-müəyyənliklərə baxmayaraq 3,6 faiz binkişaf etdiyini xatırladıb.