Türkiyənin müdafiə sənayesi şirkəti ASELSAN yanvarın 13-də bazar dəyərinin 30 milyard dollar həddini aşması ilə bu göstəriciyə çatan Türkiyənin ilk şirkəti olub. Şirkət eyni zamanda Avropanın ən dəyərli müdafiə sənayesi aktorları arasında mövqeyini möhkəmləndirib.

İxracatının güclü şəkildə artması və inkişaf etmiş, yüksək təsir gücünə malik texnologiyalara fokuslanması nəticəsində ASELSAN Avropanın ən dəyərli 10 müdafiə sənayesi şirkəti sırasına daxil olub.

ASELSAN-ın NATO üzvü olan Polşa ilə yaxın zamanda imzalanmış 410 milyon dollarlıq müdafiə müqaviləsi ilə diqqət çəkən yüksəlişi, şirkətin beynəlxalq bazarlarda aktiv genişlənmə strategiyası hesabına daha da sürətlənib.

Avropa ölkələrində təhlükəsizliklə bağlı narahatlıqların və bununla əlaqədar olaraq müdafiə xərclərinin artdığı bir dövrdə imzalanan bu razılaşma, şirkətin ixracat yönümlü strategiyasını bir daha ön plana çıxarıb.

Qlobal bazarların texnologiya yönümlü şirkətlər ətrafında cəmləşməsi fonunda investorlar da ASELSAN-a maraq göstərməyə başlayıb. Bununla da şirkət Türkiyənin texnoloji transformasiyasının əsas simvollarından biri kimi önə çıxıb.

Qeyd edək ki, şirkətin sifariş portfeli 2023-cü ilin əvvəlindən bu yana 120 faiz artaraq 17,9 milyard dollara çatıb. Bu göstərici eyni dövrdə qlobal müdafiə sənayesində qeydə alınan orta artım tempi olan 42 faizdən təxminən üç dəfə yüksəkdir.

ASELSAN-ın ixracatı da əhəmiyyətli dərəcədə artıb. Türkiyənin müdafiə sənayesi nəhəngi 2025-ci ilin ilk doqquz ayı ərzində 1,45 milyard dollar dəyərində yeni ixracat müqavilələri imzalayaraq, əvvəlki ilin eyni dövrü ilə müqayisədə 171 faiz artım qeydə alıb.