NATO-nun 36-cı sammiti çərçivəsində "Türkiyənin müdafiə sənayesi NATO müdafiə sisteminin təməl daşıdır" mövzusunda panel iclas keçirilib. Türkiyə Prezidenti Administrasiyasının Kommunikasiya İdarəsi, MSC və SETA-nın təşkilatçılığı ilə keçirilən tədbirdə Türkiyənin NATO-nun istehsal və çəkindirmə məqsədlərinə töhfələri müzakirə olunub.

ROKETSAN-ın baş direktoru Murat İkinci Türkiyə müdafiə sənayesinin ən böyük gücünün qabaqcıl texnologiya ilə yanaşı, bir çox müttəfiqdə olmayan güclü təchizat zənciri olduğunu vurğulayıb. O, sektorda 3500-dən çox təchizatçının fəaliyyət göstərdiyini, ROKETSAN-ın isə 2000-dən çox şirkətlə əməkdaşlıq edərək məhsullarını 50-dən çox ölkəyə ixrac etdiyini bildirib.

ASELSAN-ın baş direktoru Əhməd Akyol isə müdafiə büdcələrini sürətlə real hərbi qabiliyyətə çevirməyin əsas çətinlik olduğunu qeyd edib. Ukrayna müharibəsindən sonra təkcə texnoloji mükəmməlliyin kifayət etmədiyini deyən Ə.Akyol zamanın məhdud olduğu bu yeni reallıqda Türkiyənin unikal infrastruktura və dinamik ekosistemə sahib olduğunu diqqətə çatdırıb. O, həmçinin ASELSAN-ın NATO müttəfiqi olan ölkələrdəki fəaliyyəti barədə məlumat verib.