Pakistanda hərbi qərargaha təşkil edilən hücum nəticəsində üç zabit həyatını itirib. Bu barədə yerli polis məlumat yayıb. Bildirilir ki, hücum zamanı hər üç silahlı terrorçu zərərsizləşdirilib.
Terror aktı Pakistanın Əfqanıstanla həmsərhəd olan Xaybər Paxtunxva əyalətinin paytaxtı Peşəvərdə baş verib. Peşəvər Polis İdarəsinin rəisi Mian Səid bildirib ki, hücum nəticəsində Federal Qvardiyanın (FQ) üç əməkdaşı şəhid olub, dörd nəfər isə yaralanıb. Onun sözlərinə görə, silahlılardan biri Federal Jandarmanın əyalət qərargahının girişində üzərindəki partlayıcı qurğunu partladıb. Daha sonra binaya daxil olan iki digər silahlı isə təhlükəsizlik qüvvələri tərəfindən zərərsizləşdirilib.
M. Səid qeyd edib ki, təhlükəsizlik qüvvələrinin sürətli reaksiyası daha böyük itkilərin qarşısını alıb və vəziyyət qısa müddətdə nəzarətə götürülüb.
Pakistan Prezidenti Asif Əli Zərdari və Baş nazir Şahbaz Şərif hücumu qınayıb və təhlükəsizlik qüvvələrinə operativ müdaxiləyə görə təşəkkür ediblər.
Hücumun məsuliyyətini hələlik heç bir qruplaşma öz üzərinə götürməyib. Keçmişdə buna bənzər hücumlarda günahlandırılan ‘‘Təhriki-e-Taliban Pakista’’nın (TTP) bu hadisədə də rolunun ola biləcəyi ehtimal olunur.
Son dövrlərdə baş verən bu kimi hücumlar İslamabadla Əfqanıstandakı Taliban hökuməti arasında münasibətləri gərginləşdirib. Pakistan iddia edir ki, Taliban 2021-ci ildə hakimiyyətə gəldikdən sonra TTP Əfqanıstan ərazisində sərbəst fəaliyyət göstərir. Rəsmi Kabil isə bu iddiaları rədd edir.
