İsrailin müdafiə naziri İsrael Katz bildirib ki, regional və beynəlxalq səylərə baxmayaraq İsrail Livan, Suriya, Qəzza və Yəməndə hərbi əməliyyatlarını davam etdirəcək və mövqelərindən geri çəkilməyəcək.

“Maariv” qəzetinin məlumatına görə, Katz bu açıqlamanı İsrail Hərbi Hava Qüvvələrinin pilotları üçün təşkil olunan təlim kursunda səsləndirib. O, qeyd edib ki, İsrail qeyd olunan bölgələrdə fəaliyyətini davam etdirməkdə qərarlıdır.

Tədbirdə İsrailin baş naziri Benyamin Netanyahu və Baş Qərargah rəisi Eyal Zamir də iştirak ediblər.

İsrael Katz bildirib ki, Livanda Hizbullaha qarşı maksimum güc tətbiq olunacaq, Suriyada isə Hermon dağı (Cəbəl Şeyx) və təhlükəsizlik zonasından geri çəkilmək planlaşdırılmır. Qəzzada “Həmas”a qarşı əməliyyatların davam edəcəyini deyən Katz Yəməndə husilərin hərbi imkanlarını inkişaf etdirməsinin qarşısını almaq üçün də tədbirlərin görüləcəyini vurğulayıb.

Tehranla gərginliyə də toxunan müdafiə naziri İsrailin İranın nüvə və strateji imkanlarına ciddi zərər vurduğunu iddia edib. Katz bildirib ki, ABŞ-la əməkdaşlıq çərçivəsində aparılan əməliyyatlarla bağlı məlumatları izləyir.