Türkiyənin energetika və təbii sərvətlər naziri Alparslan Bayraktar Türkiyə və Azərbaycanın elektrik enerjisi sahəsində üç böyük layihə həyata keçirməyi planlaşdırdıqlarını bildirib.
Dünyada böhranların artıq adi hala çevrildiyini deyən nazir bildirib ki, məhz belə çətin dövrdə Azərbaycanla Türkiyə arasındakı əməkdaşlıq daha böyük əhəmiyyət kəsb edir. Alparslan Bayraktar Bakı-Tbilisi-Ərzurum, TANAP və TAP kimi boru xətlərinin əhəmiyyətinə diqqət çəkib. O qeyd edib ki, təkcə TANAP kəməri vasitəsilə bu günə qədər Avropaya 100 milyard kubmetr qaz nəql edilib.
Türkiyə və Azərbaycanın bir-birini tamamlayan xüsusiyyətlərə malik olduğunu qeyd edən Bayraktar Azərbaycanın mühüm neft və qaz istehsalçısı olmaqla yanaşı, artıq böyük bir elektrik enerjisi istehsalçısına çevrildiyini, Türkiyənin isə həm sürətlə böyüyən enerji bazarı, həm də Avropaya birbaşa çıxışı olan güclü bir körpü rolunu oynadığını vurğulayıb.
Bayraktar mövcud infrastrukturun potensialından tam şəkildə yararlanmağın vacibliyinə də diqqət çəkib. O bildirib ki, Bakı-Tbilisi-Ceyhan neft kəmərindən hazırda gündəlik 600 min barel neft nəql olunsa da, xəttin ümumi ötürücülük qabiliyyəti 1 milyon bareldir. Gələcəkdə Mərkəzi Asiya və Türk dünyasındakı digər mənbələrdən gələn neftin də bu xətlə nəql olunması mümkündür və təbii qaz üçün də buna bənzər yeni addımlar atıla bilər.
Yaxın gələcəkdə elektrik sahəsində böyük layihələrin həyata keçiriləcəyini açıqlayan Bayraktar bildirib ki, hazırda əsas diqqət üç mühüm layihəyə yönəlib: Naxçıvandan Türkiyəyə elektrik xəttinin çəkilməsi, Türkiyə, Gürcüstan, Azərbaycan və Bolqarıstanı birləşdirən yaşıl enerji dəhlizi, həmçinin Qara dənizin dibi ilə birbaşa Avropaya uzanacaq elektrik ötürmə xətti.
