İranın xarici işlər naziri Abbas Əraqçi bildirib ki, ABŞ-ın atəşkəs əldə olunduğunu iddia etməsinə baxmayaraq, İsraillə bu barədə heç bir rəsmi razılaşma mövcud deyil.
“Hazırda atəşkəs və ya hərbi əməliyyatların dayandırılması ilə bağlı heç bir razılaşma yoxdur”, – deyə Abbas Əraqçi rəsmi “X” internet səhifəsində etdiyi paylaşımda bildirib.
A.Əraqçi qeyd edib ki, İranın hərbi fəaliyyətləri İsrailin təcavüzünə verilən cavabdır.
Abbas Əraqçi bu açıqlamanı ABŞ Prezidenti Donald Trampın İsrail və İranın “tam və qəti” atəşkəsə razılaşdıqlarını elan etməsindən bir neçə saat sonra verib.
Əraqçi vurğulayıb ki, əgər İsrail çərşənbə axşamı, İran vaxtı ilə saat 04:00-a qədər hücumlarını dayandırarsa, Tehran da cavab tədbirləri görməyəcək.
“Əgər İsrail rejimi İran xalqına qarşı qanunsuz təcavüzünü dayandırarsa, biz də hücumları davam etdirməyəcəyik”, – deyə o bildirib. Əraqçi həmçinin bildirib ki, hərbi əməliyyatların tam dayandırılması ilə bağlı yekun qərar daha sonra veriləcək.
Nazir daha sonra etdiyi paylaşımında İran qüvvələrini əməliyyatları “son dəqiqəyə qədər” davam etdirdiklərinə görə alqışlayıb və onların ölkəni “son damla qanlarına qədər” müdafiə etməyə hazır olduqlarını vurğulayıb.
Bu bəyanatlar, ABŞ-ın elan etdiyi atəşkəsin tam şəkildə qüvvəyə minib-minmədiyi və bütün tərəflər tərəfindən qəbul olunub-olunmadığı ilə bağlı qeyri-müəyyənliyi ön plana çıxarır.
Atəşkəslə bağlı danışıqlar davam edərkən İsrail, İranın yeni raketlər atdığını iddia edib. İran mediası isə İsrailin nüvə sahəsi üzrə alim Məhəmməd Rza Sıddıqini qətlə yetirdiyini açıqlayıb.
İsrail-İran gərginliyi
İsraillə İran arasındakı qarşıdurma iyunun 13-də İsrailin İranın nüvə və hərbi obyektlərinə hava zərbələri endirməsi ilə başlayıb.
ABŞ qüvvələrinin İranın üç əsas nüvə obyektini hədəf alması münaqişəni daha da alovlandırıb.
Bazar ertəsi isə İran, ABŞ ordusunun Qətərdə yerləşən Əl-Udeyd aviabazasını ballistik raketlərlə atəşə tutaraq bölgədə daha genişmiqyaslı qarşıdurma qorxusunu artırıb.
