Kreml ABŞ, Ukrayna və Rusiyanın Birləşmiş Ərəb Əmirliklərində danışıqlar aparmaq barədə razılığa gəldiyini açıqlayıb.
Qərar Rusiya prezidenti Vladimir Putin və ABŞ-nin yüksək vəzifəli nümayəndəsi Stiv Uitkoff arasında Moskvanın "konstruktiv" adlandırdığı təmaslardan sonra verilib.
Son aylarda Ukraynada müharibəyə son qoymaq üçün səylər artsa da, Moskva ilə Kiyev arasında, xüsusən də ərazi nəzarəti və müharibədən sonrakı mümkün həll yolu çərçivəsi ilə bağlı dərin fikir ayrılıqları qalmaqdadır.
Kremlin açıqlamasına görə, Uitkoff və Putin arasında son görüş Moskvada baş tutub və bu gün (23 yanvar 2026) səhər saatlarına qədər davam edib.
Kremlin diplomatik müşaviri Yuri Uşakov jurnalistlərə deyib ki, müzakirələr “hər baxımdan faydalı” olub.
Uitkoff və ABŞ nümayəndə heyətinin Əbu-Dabiyə getdikləri, orada danışıqların davam etdirilməsi gözlənilir.
Uşakov bildirib ki, Rusiya nümayəndə heyəti də GRU hərbi kəşfiyyat idarəsinin direktoru, general İqor Kostyukovun rəhbərliyi ilə BƏƏ-ə yola düşəcək. Təhlükəsizlik məsələləri üzrə üçtərəfli işçi qrupun ilk görüşünün bu gün Əbu-Dabidə keçiriləcəyi razılaşdırılıb.
Danışıqların daha ətraflı təfərrüatları açıqlanmayıb və Rusiya ilə Ukrayna rəsmilərinin üz-üzə görüşüb-görüşməyəcəyi hələ məlum deyil.
“Münaqişəni siyasi və diplomatik vasitələrlə həll etməkdə səmimi maraqlıyıq. Bu baş verənədək, Rusiya döyüş meydanında öz məqsədlərinə çatmağa davam edəcək”, deyə Uşakov qeyd edib.
Digər tərəfdən yanvarın 22-də Ukrayna prezidenti Volodimir Zelenski layihə sazişin “demək olar ki, hazır” olduğunu bildirərək əlavə edib ki, onunla ABŞ prezidenti Donald Tramp müharibədən sonrakı təhlükəsizlik zəmanətləri məsələsində razılığa gəliblər.
BƏƏ-dəki danışıqlar cari diplomatik təşəbbüsdən bəri Vaşinqton, Kiev və Moskvanın rəsmilərini əhatə edən ilk təsdiqlənmiş üçtərəfli görüşdür.
