“Çin illərdir davam edən Yaponiya dəniz məhsulları idxalına tətbiq olunan ümumi qadağanı qismən ləğv edib. Bu qərar dərhal qüvvəyə minib”, Çin gömrük orqanları bildirib.

  Çinin Gömrük Baş İdarəsinin 29 iyun açıqlamasına görə, bu qərar “Uzunmüddətli beynəlxalq və müstəqil Çin nümunə götürmə və tullantı sularının monitorinqi” nəticəsində heç bir anormallıq aşkar edilmədikdən sonra qəbul olunub. Lakin Tokio və Fukusima da daxil olmaqla, Yaponiyanın 10 prefekturasından olan su məhsullarının ölkəyə daxil olması hələ də qadağandır. Bu ümumi qadağa Tokio Elektrik Enerjisi Şirkəti – “Tepco”nun 2023-cü ilin avqustunda Fukusima Daiiçi nüvə elektrik stansiyasından təmizlənmiş radioaktiv tullantı sularını Sakit okeana buraxmağa başlamasından sonra tətbiq edilmişdi. Qadağanın qismən ləğv edilməsi qərarı həmçinin Yaponiya hökumətinin Çinə ixrac olunan məhsulların təhlükəsizliyini və keyfiyyətini təmin edəcəyinə dair verdiyi vəddən sonra qəbul olunub.

  İxracatçılar Çinə ixrac üçün Yaponiya hökumətindən radioaktiv maddələrə dair yoxlama sertifikatı tələb edəcəklər.

  “The Japan Times” xəbər verir ki, Yaponiya Çin hökumətini 10 prefektura üçün qadağanı tamamilə ləğv etməyə çağıracaq.