Atəşkəsə baxmayaraq, İsrail qüvvələri bu gün (10 oktyabr) səhər tezdən Xan Yunus və Qəzzanı bombalamağa davam edib.

Fələstinin rəsmi xəbər agentliyi “Wafa”nın məlumatına görə, Xan Yunisin cənubunda yerləşən Əl-Kətibə bölgəsinə bir neçə mərmi düşüb və şəhərin üzərində pilotsuz uçuş aparatları müşahidə olunub.

Qəzzanın şərq hissələri də artilleriya və helikopter atəşinə məruz qalıb.

Bu gün səhər tezdən İsrail Baş Nazirlik ofisi bəyan edib ki, İsrail hökuməti Qəzzada müharibənin dayandırılması və fələstinli qruplarla əsirlərin mübadiləsinə dair razılaşmanı təsdiqləyib.

İsrail mediasının məlumatına görə, atəşkəs İsrailin təsdiqindən dərhal sonra qüvvəyə minib.

Qeyd edək ki, sentyabrın 29-da Tramp Qəzza üçün 20 bəndlik atəşkəs planını açıqlayıb. Bu plana təxminən 2000 fələstinli girov müqabilində bütün israilli girovların azad edilməsi, daimi atəşkəs və İsrail qüvvələrinin Qəzzanın hər tərəfindən tədricən çıxarılması daxildir.

Planın ikinci mərhələsi Fələstin müqavimət qrupu HƏMAS-ın iştirakı olmadan Qəzzada yeni idarəetmə mexanizminin yaradılmasını, fələstinlilərdən və ərəb və müsəlman ölkələrinin əsgərlərindən ibarət təhlükəsizlik qüvvələrinin yaradılmasını və HƏMAS-ın tərksilah edilməsini nəzərdə tutur.

Həmçinin, yeni administrasiya və regionun yenidən qurulması üçün ərəb və islam ölkələrinin maliyyə təmin etməsi, Fələstin Administrasiyasının isə məhdud iştirakı şərti irəli sürülür.

Ərəb və müsəlman ölkələri planı ümumilikdə alqışlasa da, bəzi rəsmilər onun tam həyata keçirililə bilməsi üçün bir çox detalların müzakirə edilməsi və danışıqlar aparılmasının vacibliyini dilə gətiriblər.