Türkiyə bu günədək Daxili İşlər Nazirliyinin tabeliyində olan Fövqəladə Halların İdarə Olunması Agentliyinin (AFAD) əlaqələndirməsi ilə həyata keçirilən beynəlxalq humanitar yardım fəaliyyətləri çərçivəsində beş qitədə yerləşən 85 ölkə və icmaya yardım əli uzadıb.
AFAD ehtiyac olan istiqamətlərdə yürütdüyü yardım diplomatiyası çərçivəsində təkcə Türkiyə daxilində deyil, dünyanın müxtəlif regionlarında da axtarış-xilasetmə əməliyyatlarını və humanitar yardım fəaliyyətlərini fasiləsiz davam etdirir.
Agentliyin koordinasiyası ilə Türkiyə dövləti beş qitədəki ölkələrə və icmalara ərzaq, sığınacaq və tibbi ehtiyaclar ilə yanaşı, maliyyə yardımı, logistik dəstək və axtarış-xilasetmə avadanlıqları təmin edib.
"Anadolu" agentliyinin (AA) yaydığı məlumatlara əsasən, Türkiyənin ən böyük beynəlxalq humanitar yardım əməliyyatlarından biri Qəzza üçün reallaşdırılıb.
İsrailin hücumlarına məruz qalan bölgəyə AFAD-ın təşkilatçılığı ilə 14 təyyarə və 21 gəmi vasitəsilə ümumilikdə 109.332 ton humanitar yardım materialı təhvil verilib.
Yardım çərçivəsində ümumilikdə 7,5 milyon dollar məbləğində ianə toplanıb. Bu məbləğin 7 milyon dolları AFAD, 500 min dolları isə Türkiyə Qızıl Ayparası tərəfindən təmin olunub.
Əfqanıstan üçün həyata keçirilən humanitar yardım fəaliyyətləri çərçivəsində 25 "Xeyirxahlıq qatarı" səfəri ilə 11.739 ton yardım materialı göndərilib. Bundan əlavə, qeyd olunan ölkəyə altı yük təyyarəsi reysi də təşkil edilib.
Sudana altı gəmi ilə 10. 206 ton humanitar yardım vasitəsi və 30 min çadır çatdırılıb.
Türkiyə dövləti həmçinin Pakistana 9.079 ton, Somaliyə 3.000 ton və Livana 730 ton humanitar yardım göndərib.
Bangladeşə 64.992 humanitar yardım bağlaması, Bosniya və Herseqovinaya 60 modul tipli ev (konteyner ev), eləcə də yanacaq, gigiyenik vasitələr, generatorlar və ilkin ehtiyac vasitələri təmin edilib.
İndiyədək Suriyaya 13. 938 humanitar yardım yüklü yük avtomobili göndərilib.
Zambiyaya 25 min dollar dəyərində yardım vasitələri və 600 ərzaq bağlaması çatdırılıb. Konqo Demokratik Respublikasına 54 min 70 dollar, Burundiyə isə 60 min dollar məbləğində yardım göstərilib.
Türkiyənin son dövrlərdə həyata keçirdiyi beynəlxalq humanitar yardım əməliyyatlarından biri Venesuela üçün reallaşdırılıb. İyun ayında baş verən 7,2 və 7,5 bal gücündəki iki zəlzələdən sonra Türkiyə Respublikasının Prezidenti Rəcəb Tayyib Ərdoğanın göstərişi ilə AFAD-ın koordinasiyası altında bölgəyə iki hərbi yük təyyarəsi ilə humanitar yardım göndərilib.
Çatdırılan yüklərin tərkibində AFAD tərəfindən təmin edilən 275 çadır və Səhiyyə Nazirliyi tərəfindən ayrılan yeddi ton tibbi ləvazimat yer alıb. Beləliklə Venesuelaya ümumilikdə 30 ton humanitar yardım vasitəsi çatdırılıb.
İspaniyada baş verən sel fəlakətindən sonra isə Türkiyə bu ölkəyə həcmi 1.100 litr olan 250 ədəd plastik tullantı konteyneri və iki ədəd küçə təmizləyən nəqliyyat vasitəsi təmin edib.
