Noyabrın 29-da (bu gün) rəsmi Ankara və İslamabad rəhbərliyi Fələstin xalqı ilə Beynəlxalq Həmrəylik Gününü qeyd ediblər. Hər iki ölkə Fələstin məsələsinə dair ədalətli və davamlı həll çağırışlarını bir daha səsləndiriblər.
Türkiyənin Xarici İşlər Nazirliyi noyabrın 29-da (bu gün) yaydığı açıqlamada ölkənin Fələstin məsələsinə uzun illərdir davam edən sadiqliyini vurğulayıb.
Nazirlik bir daha bəyan edib ki, Türkiyə dövləti 1967-ci il sərhədləri əsasında müstəqil, suveren və ərazi bütövlüyünə malik Fələstin dövlətinin yaradılmasına dəstəyini davam etdirəcək. Nazirlik həmçinin qeyd edib ki, belə bir dövlətin yaranması bölgədə sülh və sabitliyin təmin olunması üçün hələ də həyati əhəmiyyət kəsb edir.
Ankara hökuməti əlavə edərək bildirib ki, Fələstinlilərə verilən dəstək sarsılmazdır və regiondakı davam edən gərginliklər, eləcə də humanitar çətinliklər nəzərə alındıqda, Fələstin xalqı ilə həmrəylik daha da önəm qazanır.
Açıqlama beynəlxalq ictimaiyyətə hərtərəfli həll üçün səyləri artırmaq çağırışı ilə başa çatıb. Türkiyənin Fələstin xalqının hüquq və azadlıqlarının təmin olunmasına yönəlmiş bütün təşəbbüslərə töhfə verməyə hazır olduğu bir daha vurğulanıb.
İsrailə tam geri çəkilmə çağırışı
“Associated Press of Pakistan” (APP) qurumunun yaydığı məlumata görə, rəsmi İslamabad da Fələstin xalqına Beynəlxalq Həmrəylik Günü münasibətilə dəstəyini təkrarlayıb.
Pakistan prezidenti Asif Əli Zərdari qeyd edib ki, Pakistan dövləti Fələstin xalqına hər cür siyasi, diplomatik, humanitar və mənəvi dəstək verməyə davam edəcək.
Ölkə başçısı A.Əli Zərdari deyib: “1967-ci ilin iyunundan əvvəlki sərhədlər əsasında paytaxtı Şərqi Qüds olan müstəqil, suveren, yaşana bilən və vahid bir Fələstin dövlətinin yaradılmasına verdiyimiz sarsılmaz dəstəyi bir daha təsdiq edirik”.
A.Əli Zərdari bildirib ki, Pakistan dövləti Fələstin xalqının yanında qətiyyətlə dayanır və rəsmi İslamabadın Fələstin məsələsinə dəstəyi insan ləyaqəti və ədalət kimi ümumbəşəri dəyərlərə əsaslanır.
Məsələylə bağlı Pakistan Baş naziri Şahbaz Şərif isə ayrıca açıqlama verərək deyib: “Fələstinlilər dövrümüzün ən dağıdıcı faciələrindən birinə məruz qalıblar. Onlar öz müqəddəratını təyin etmə hüququndan məhrum ediliblər. Fələstinlilərin torpaqları əllərindən alınır və yaşam şəraiti məhv edilir. Bu ağır həqiqət qarşısında, beynəlxalq hüquqa müvafiq olaraq İsrail tərəfindən fələstinlilərə qarşı törədilən hərbi cinayətlər və soyqırım üçün tam və etibarlı hesabatlılıq təmin edilməlidir. Fələstin xalqı qalıcı sülhə və rifaha layiq olduğundan, Qəzza da daxil olmaqla işğal altındakı bütün Fələstin torpaqlarından İsrail qüvvələrinin tam şəkildə geri çəkilməsi tələb olunur.”
Qeyd edək ki, “Həmas” müqavimət hərakatı ilə İsrail arasında Misir, Qətər və Türkiyə vasitəçiləri, eləcə də ABŞ-ın dəstəyi ilə əldə olunan atəşkəs razılaşmasının birinci mərhələsi 10 oktyabrda qüvvəyə minib.
Xatırladaq ki, İsrail 2023-cü ilin oktyabrından bəri Qəzzaya endirdiyi hücumlarda əksəriyyəti qadın və uşaq olmaqla təxminən 70.000 nəfəri öldürüb və 170.000-dən çox insanı yaralayıb.
