HƏMAS hərəkatı təxminən 20 ölkənin İsrailin işğal altındakı İordan çayının qərb sahilində həyata keçirdiyi yeni məskunlaşma siyasətini pisləyən birgə bəyanatını müsbət qarşılayıb. Hərəkat beynəlxalq ictimaiyyəti İsrailə sanksiyalar tətbiq etməyə çağırıb.
Bu ayın əvvəlində İsrail hökuməti, xüsusilə ifrat sağçı nazirlərin təşəbbüsü ilə İordan çayının qərb sahilindəki torpaqların "dövlət mülkiyyəti" kimi qeydiyyata alınması prosesini sürətləndirib. Eyni zamanda, israillilərin bu ərazilərdə birbaşa torpaq almasına icazə verən qərarlar təsdiqlənib ki, bu da beynəlxalq hüquqa görə qanunsuz hesab olunur.
Fevralın 23-də Türkiyə, Səudiyyə Ərəbistanı, Misir, Fransa və İspaniya da daxil olmaqla 18 ölkə İsrailin bu addımlarını sərt şəkildə tənqid edən bəyanat yayıb. Sənəddə qeyd olunub ki, bu fəaliyyətlər bölgədəki reallığı dəyişdirməyə və de-fakto ilhaqı irəli aparmağa yönəlmiş planlı bir siyasətin tərkib hissəsidir.
Bəyanatda qeyd olunub ki, bu hərəkətlər müstəqil Fələstin dövlətinin qurulması ideyasına birbaşa zərbə vurur.
HƏMAS hərəkatı təxminən 20 ölkənin İsrailin işğal siyasətini pisləyən birgə bəyanatını yüksək qiymətləndirib. Hərəkat bu addımı beynəlxalq hüquq və BMT qətnamələrini kobud şəkildə pozan işğal planlarına qarşı mübarizədə atılmış düzgün və zəruri addım kimi qiymətləndirib.
Fələstin müqavimət hərəkatı yaydığı açıqlamada müvafiq ölkələri daha kəskin addımlar atmağa səsləyib. Bəyanatda ‘‘faşist işğal hökuməti"nin ilhaq, qanunsuz məskunlaşma və məcburi köçürmə siyasətini dayandırmaq üçün İsrailə qarşı çəkindirici sanksiyaların tətbiq edilməsi və təzyiqlərin artırılması tələb olunub.
HƏMAS vurğulayıb ki, İsrailin son addımları həm İordan çayının qərb sahilində, həm də Qəzza zolağında fələstinlilərə qarşı davam edən genişmiqyaslı təcavüzün tərkib hissəsidir.
Hazırda İordan çayının qərb sahilində 3 milyona yaxın fələstinli ilə yanaşı, beynəlxalq hüquqa görə qanunsuz hesab edilən yaşayış məntəqələrində 500 mindən çox israilli məskunlaşıb. Fəalların bildirdiyinə görə, İsrail hökuməti bu prosesi sürətləndirərək 54 yeni yaşayış məntəqəsinin tikintisinə icazə verib.
