Rusiya prezidenti Vladimir Putin bildirib ki, Ukraynaya uzun mənzilli “Tomaqavk” raketlərinin mümkün tədarükü Moskva ilə Vaşinqton arasındakı münasibətləri məhv edəcək.
Bu fikri o, rusiyalı jurnalist Pavel Zarubinə verdiyi müsahibə zamanı səsləndirib.
"Bu, münasibətlərimizin pozulmasına gətirib çıxaracaq. Yaxud bu münasibətlərdə müşahidə olunan müsbət meyllərin sonu olacaq. Ona görə də fikrimi açıq şəkildə ifadə edirəm. Amma hadisələrin necə inkişaf edəcəyi təkcə bizdən asılı deyil", – deyə Vladimir Putin qeyd edib.
“Valday” Beynəlxalq Diskussiya Klubunun plenar iclasında çıxışı zamanı Vladimir Putin bildirib ki, Ukraynaya bu cür raketlərin verilməsi heç bir halda döyüş meydanındakı qüvvələr balansını dəyişməyəcək.
O, həmçinin qeyd edib ki, “Tomaqavk” qanadlı raketlərindən Amerika hərbçilərinin birbaşa iştirakı olmadan istifadəsi mümkün deyil və bu hal Rusiya-ABŞ münasibətlərində yeni bir mərhələyə keçid anlamına gələr.
Kreml də öz növbəsində ABŞ-ın Ukraynaya “Tomaqavk” raketləri tədarükü ilə bağlı mümkün qərarına uyğun cavab veriləcəyini bəyan edib.
Qeyd edək ki, “Tomaqavk” qanadlı raketləri təxminən 2500 kilometrə qədər uçuş məsafəsinə malikdir.
Xatırladaq ki, keçən ay Ukrayna prezidenti Volodimir Zelenski “Axios” nəşrinə verdiyi müsahibədə BMT Baş Assambleyasının Nyu-Yorkda keçirilən 80-ci sessiyası zamanı ABŞ prezidenti Donald Trampdan “Tomaqavk” raketləri tələb etdiyini açıqlamışdı.
Bundan bir neçə gün sonra ABŞ-ın vitse-prezidenti Cey Di Vens Vaşinqtonun bu tələbi nəzərdən keçirdiyini və son qərarın Tramp tərəfindən veriləcəyini bildirmişdi.
