“Reuters” xəbər agentliyinə istinadən əldə olunan məlumata görə, ABŞ-nin xüsusi nümayəndələri Stiv Uitkoff və Cared Kuşner yanvarın 24-də İsrailin baş naziri Benyamin Netanyahu ilə görüşərək Qəzzadakı vəziyyəti müzakirə ediblər. Lakin bununla bağlı hələlik İsrail Baş Nazirliyindən açıqlama verilməyib.
İsrailin “Yedioth Ahronoth” qəzetinin məlumatına görə, ABŞ Mərkəzi Qüvvələr Komandanlığının (US Central Command) rəhbəri general Bred Kuper də İsrailə səfər edən heyət arasında olub. Qəzet yazıb ki, B.Kuper gün ərzində ölkənin yüksək vəzifəli təhlükəsizlik rəsmiləri ilə görüş keçirib.
İsrailin “Kanal 12” televiziya kanalı isə bildirib ki, səfər ABŞ-nin bölgədə hərbi mövcudluğunu artırmaqda davam etməsi fonunda, rəsmi Tehranın mümkün ABŞ hərbi hücumunun hədəf ola biləcəyi ilə bağlı artan narahatlıqlar şəraitində baş tutur.
“Kanal 12”nin məlumatına görə, B.Kuper həmçinin İsrail Silahlı Qüvvələrinin Baş Qərargah rəisi Eyal Zamir və Hərbi Hava Qüvvələrinin komandanı Tomer Bar ilə də görüşüb.
İsrail ordusu yanvarın 22-də yaydığı açıqlamada, Tel-Əvivdə aparılan müzakirələrin ABŞ-nin İrana qarşı hərbi əməliyyata başlama ehtimalına işarə etdiyini bildirərək, bütün hərbi hava qüvvələrinin yüksək hazırlıq vəziyyətinə gətirildiyini açıqlayıb.
ABŞ və onun müttəfiqi İsrailin Tehran hakimiyyəti üzərində təzyiqləri, İranda ötən ilin dekabr ayının sonlarında pisləşən iqtisadi və sosial şəraitin səbəb olduğu etiraz aksiyalarının başlamasından sonra daha da artıb. Tehran rəhbərliyi isə rəsmi Vaşinqtonu sanksiyalar, siyasi təzyiq, iğtişaşları qızışdırmaq və xaos yaymaq yolu ilə hərbi müdaxilə və rejim dəyişikliyi üçün bəhanə yaratmağa çalışmaqda ittiham edib.
ABŞ prezidenti Donald Tramp yanvarın 22-də verdiyi açıqlamada, ABŞ-nin İrana doğru irəliləyən bir hərbi gəmisi olduğunu bildirib, lakin bundan istifadə etməyə məcbur qalmamağa ümid etdiyini deyib. D.Tramp həmçinin rəsmi Tehrana etirazçıların öldürülməsi və ya nüvə proqramının yenidən işə salınması məsələlərində bir daha xəbərdarlıq edib.
Qəzza
Digər tərəfdən, Qəzzanı müvəqqəti idarə etmək məqsədilə yaradılmış fələstinlilərdən ibarət keçid komitəsinin sədri Əli Şaat yanvarın 22-də verdiyi açıqlamada Qəzzaya giriş və çıxışların demək olar ki, hamısı üçün yeganə keçid nöqtəsi olan Rəfah Sərhəd Keçid Məntəqəsinin gələn həftə açılacağını bildirib. Sözügedən keçid məntəqəsi Qəzzada yaşayan 2 milyondan çox insan üçün həyati əhəmiyyət daşıyır.
Lakin məsələ barədə üç mənbənin bildirdiyinə görə, İsrail Misir sərhədində yerləşən bu keçid məntəqəsindən Qəzzaya daxil olan fələstinlilərin sayını məhdudlaşdırmaq və Qəzzadan çıxanların sayının daxil olanlardan çox olmasını istəyir. Bu tələb, keçid məntəqəsinin açılmasının gözlənildiyi dövrdə gündəmə gətirilib.
Xatırladaq ki, Rəfah Sərhəd Keçid Məntəqəsinin İsrail ilə “Həmas” arasında ötən ilin oktyabr ayında əldə olunan atəşkəs razılaşması çərçivəsində, D.Trampın müharibəyə son qoymağa yönəlmiş planının birinci mərhələsində açılması nəzərdə tutulurdu.
Qəzza Səhiyyə Nazirliyinin məlumatına görə, 2023-cü il oktyabrın 7-dən bu yana İsrailin Qəzzada həyata keçirdiyi soyqırımı nəticəsində həlak olanların sayı 71 min 654 nəfərə çatıb. Oktyabr ayındakı atəşkəsdən sonra isə 481 fələstinli həyatını itirib.
Rəsmi Vaşinqton bu ayın əvvəlində Qəzza üzrə planın ikinci mərhələsinə keçildiyini açıqlayaraq, bu mərhələdə İsrailin Qəzzadan daha çox hərbi qüvvə çıxarmasının gözlənildiyini bəyan edib.
Rəfah Sərhəd Keçid Məntəqəsinin Qəzza tərəfi isə 2024-cü ildən etibarən İsrail ordusunun hərbi nəzarəti altında qalır.
