Ukrayna hakimiyyət orqanları Kiyevin kütləvi ballistik raket hücumuna məruz qaldığını və ilkin məlumatlara görə, ən azı beş nəfərin yaralandığını bildirib. Paytaxtda güclü partlayış səsləri eşidilib. Hücum zamanı onlarla sakin şəhər mərkəzindəki metro stansiyalarına sığınıb. Kiyev Şəhər Hərbi Administrasiyasının rəhbəri Timir Tkaçenko "Telegram" kanalında paylaşım edərək paytaxtın kütləvi ballistik raket zərbələrinə məruz qaldığını təsdiqləyib. Kiyev meri Vitali Kliçko isə yaralanan beş nəfərdən birinin xəstəxanaya yerləşdirildiyini, Şevçenko, Dnepr və Podolski rayonlarında binalara ziyan dəydiyini və yanğınların baş verdiyini qeyd edib.
Hücumdan əvvəl Ukrayna rəsmiləri və ABŞ-ın Kiyevdəki səfirliyi paytaxta qarşı genişmiqyaslı hava zərbələri riski barədə xəbərdarlıq etmişdilər. Ukrayna Prezidenti Volodimir Zelenski mayın 23-də verdiyi bəyanatda Rusiyanın Kiyev də daxil olmaqla Ukrayna ərazisinə müxtəlif silahlar, o cümlədən "Oreşnik" hipersəs raketləri ilə hücuma hazırlaşdığına dair əlamətlər gördüklərini bildirmişdi.
Rusiya daha əvvəl Ukraynanın şərqinə endirilən zərbələrə görə qisas alacağını bəyan etmişdi. Rəsmi Moskva bildirib ki, Ukrayna qüvvələrinin işğal altındakı Luqansk vilayətinin Starobelsk şəhərinə pilotsuz uçuş aparatları (PUA) ilə təşkil etdiyi hücum nəticəsində kollec yataqxanası vurulub, ən azı 18 nəfər ölüb, 42 nəfər isə yaralanıb. Rusiya tərəfi ölənlərin əksəriyyətinin 2003-2008-ci il təvəllüdlü gənc qadınlar olduğunu bildirib. Ukrayna isə mülki şəxsləri hədəf aldığını qətiyyətlə təkzib edərək, cəbhə xəttindən təxminən 65 kilometr məsafədə yerləşən Starobelskdəki Rusiya PUA bölməsini vurduğunu bəyan edib.
