Bununla da hər iki tərəf daha geniş ticarət və təhlükəsizlik əlaqələrinə sadiq qalacaqlarına dair vəd veriblər.
Hindistan Birləşmiş Ərəb Əmirliklərindən mayeləşdirilmiş təbii qaz (LNG) almaq üçün 3 milyard dollarlıq müqavilə imzalayıb. Həmin müqavilə ABŞ-ı BƏƏ-nin ən böyük müştərisinə çevirib. İki ölkənin liderləri ticarət və müdafiə münasibətlərini gücləndirmək üçün danışıqlar aparıblar.
Razılaşma yanvarın 19-da BƏƏ prezidenti Şeyx Məhəmməd bin Zayed Al Nəhyanın Hindistana iki saatlıq qısa səfəri zamanı imzalanıb. Səfər zamanı Hindistanın Baş naziri Narendra Modi ilə danışıqlar aparılıb. İki lider altı il ərzində ikitərəfli ticarəti 200 milyard dollara çatdırmağı vəd ediblər və strateji müdafiə tərəfdaşlığı qurmaq barədə razılaşıblar.
Əbu-Dabi dövlətinə məxsus "ADNOC Gas" şirkəti 10 il ərzində Hindistanın "Hindustan Petroleum Corp." şirkətinə ildə 0,5 milyon metrik ton LNG tədarük edəcək.
"ADNOC Gas" bu müqavilənin Hindistanla müqavilələrinin ümumi dəyərini 20 milyard dollardan çox artırdığını bildirib və əlavə edib ki, Hindistan hazırda BƏƏ-nin ən böyük müştərisidir və "ADNOC Gas"ın LNG strategiyasının çox vacib bir hissəsidir.
Strateji müdafiə tərəfdaşlığı
BƏƏ Hindistanın üçüncü ən böyük ticarət tərəfdaşıdır. Şeyx Məhəmməd müdafiə və xarici işlər nazirlərinin də daxil olduğu hökumət nümayəndə heyəti ilə Hindistana gəlib. Hindistanın dövlət katibinin müavini Vikram Misri jurnalistlərə bildirib ki, tərəflər strateji müdafiə tərəfdaşlığı qurmaq üçün işləməyə dair niyyət məktubu imzalayıblar.
Hindistanın əsas rəqibi və qonşusu Pakistan ötən il Səudiyyə Ərəbistanı ilə qarşılıqlı müdafiə müqaviləsi imzalayıb və ötən həftə pakistanlı nazir ölkəsi Türkiyə ilə Səudiyyə Ərəbistanı arasında üçtərəfli müdafiə müqaviləsi layihəsinin hazırlandığını açıqlayıb.
İllərdir yaxın müttəfiq olan Səudiyyə Ərəbistanı və Birləşmiş Ərəb Əmirlikləri regional siyasətdə getdikcə daha çox fikir ayrılığına malikdirlər. Bu fikir ayrılığı özünü Yəməndə də göstərib və iki ölkə arasında neft hasilatı ilə bağlı da fikir ayrılıqları olub.
Lakin Misri niyyət məktubunun imzalanmasının Hindistanın regional münaqişələrə cəlb olunacağı anlamına gəlmədiyini bildirərək deyib: "Müdafiə və təhlükəsizlik sahəsində regiondakı bir ölkə ilə əməkdaşlığımız mütləq regiondakı konkret münaqişələrdə tərəf tutacağımız qənaətinə gəlməyə gətirib çıxarmır".
