İsrail Baş naziri Benyamin Netanyahu artan beynəlxalq təzyiqlərə baxmayaraq, işğal altındakı İordan çayının qərb sahilində qanunsuz məskunlaşmalar salmağa davam edəcəyini bəyan edib və regiona böyük “köç” dalğasının olacağı vədini dilə gətirib.

Oktyabr ayında keçiriləcək gərgin seçkilərlə qarşı-qarşıya olan Netanyahu İsrail tarixinin ən sağçı hökumətlərindən birinə rəhbərlik edir. Bu hökumət beynəlxalq hüquqa görə qanunsuz sayılan işgal altındakı İordan çayının qərb sahilində məskunlaşma yerlərinin tikintisini və genişləndirilməsini sürətlə təsdiqləyib.

Adətən yalnız bir neçə mobil evdən və ya müvəqqəti tikilidən ibarət olan bu məskunlaşma məntəqələri İsrail qanunvericiliyinə görə də qanunsuz hesab olunur, lakin son illərdə onların təsdiqlənməsi və qanuni hala gətirilməsi prosesi sürətlənib.

Ofisindən verilən bəyanata görə, Netanyahu çərşənbə axşamı gecəsi qanunsuz məskunlaşanlar üçün təşkil edilən tədbirdə deyib: "Rəqəmlərə göz yummaq olmaz: Birlikdə saldığımız və leqallaşdırdığımız 104 yaşayış məntəqəsi və 160 təsərrüfat var, bu proses davam edəcək".

O, iştirakçılara müraciətlə bildirib: "Siz “İsrail Torpağı” baxışını reallaşdırırsınız və bura bizim torpağımızdır".

Netanyahu həmçinin qanunsuz məskunlaşanların "gələcəkdə gözlənilən çox böyük bir köç dalğası üçün zəmin hazırladıqlarını" vurğulayıb və bunu "nəsillərin baxışını reallaşdırmaq üçün hökumətin nəhəng səyi" kimi qiymətləndirib.

Məskunlaşmanın genişləndirilməsi tənqidlərə səbəb olur

İsrail İordan çayının qərb sahilində qanunsuz məskunlaşmanı genişləndirdiyinə görə artan beynəlxalq tənqidlərlə üzləşir; eyni zamanda israilli məskunlaşanların fələstinlilərə qarşı zorakılığı da kəskin artıb.

Keçən həftə İsrail hakimiyyətinin regionda 1 200-dən çox mənzil üçün tender elan etməsindən sonra bir neçə Avropa lideri böyük məskunlaşma layihəsini pisləyib.

İsrailin keçən il təsdiqlədiyi E1 planı İordan çayının qərb sahilinin şimal və cənub hissələri arasındakı ərazi əlaqəsini təhlükə altına alır və müstəqil Fələstin dövlətinin qurulması ümidlərini daha da zəiflədir.

İsrail 1967-ci ildən bəri İordan çayının qərb sahilini işğal altında saxlayır. Hazırda burada 500 000-dən çox qanunsuz israilli məskunlaşan təxminən üç milyon fələstinli ilə birlikdə yaşayır.

Netanyahunun hökumətində regionun ilhaqını açıq şəkildə dəstəkləyən nazirlər yer alır və hökumət 27 oktyabr seçkiləri ərəfəsində tikinti işlərini daha sürətləndirir.

İsrailin Qəzzada başladığı soyqırımı xarakterli müharibədən sonra israilli məskunlaşanların fələstinlilərə qarşı zorakılığı kəskin şəkildə artım göstərib.