Türkiyənin Xarici İşlər Nazirliyi Avstraliyanın Sidney şəhərində Hanuka bayramı tədbirləri zamanı həyata keçirilən terror hücumunu kəskin şəkildə pislədiyini açıqlayıb.
Dekabrın 14-də yayımlanan yazılı bəyanatda Xarici İşlər Nazirliyi hücum nəticəsində həlak olanların ailələrinə və Avstraliya xalqına başsağlığı verib, yaralananlara isə tezliklə şəfa diləyib.
Bəyanatda deyilir: “Türkiyə terrorun bütün növlərinə qarşı prinsipial mövqeyini bir daha bəyan edir.”
Bununla da rəsmi Ankaranın terrorla mübarizədə beynəlxalq əməkdaşlığa sadiqliyi xüsusi qeyd olunub.
Nazirlik Türkiyənin Avstraliya ilə həmrəylik nümayiş etdirdiyini bildirib və “qlobal təhlükə” ilə mübarizədə əməkdaşlığın davam etdirilməsinə sadiq qaldığını bir daha bəyan edib.
Qeyd edək ki, dekabrın 14-də Sidneyin məşhur “Bondi” çimərliyində baş verən kütləvi silahlı hücum nəticəsində təxminən 16 nəfər ölüb, çoxsaylı şəxs yaralanıb. Hadisə son illərdə Avstraliyada qeydə alınan ən qanlı silahlı hücumlardan biri kimi qiymətləndirilir.
