Türkiyənin Xarici İşlər naziri Hakan Fidan bəyan edib ki, Suriyada fəaliyyət göstərən qeyri-dövlət aktorlarının mümkün parçalanma və sabitliyi pozma təşəbbüsləri Türkiyə tərəfindən milli təhlükəsizliyə birbaşa təhdid kimi qəbul olunacaq və bu çərçivədə müdaxilə ediləcək.

H.Fidan bu açıqlamanı iyulun 22-də (bu gün) Ankarada Salvadordan olan həmkarı Aleksandra Hill ilə keçirdiyi birgə mətbuat konfransında verib. O bildirib ki, İsrail regiondakı vəziyyəti daha da zəiflətməyə və xaos içində saxlamağa yönəlik bir siyasət aparır.

Nazir əlavə edib ki, İsrail ətrafında sabitlik arzulamır və Suriyanı bölmək məqsədi güdür.

Xəbər verildiyi kimi, 13 iyulda Süveyda şəhərində bədəvi ərəblərlə silahlı druz milisləri arasında qarşıdurmalar başlayıb. Şiddət artdıqdan sonra İsrail paytaxt Dəməşqdə yerləşən Suriya hərbi mövqeləri və infrastrukturunu hədəf alan hava hücumları həyata keçirib.

Qeyd edək ki, İsrail bu hücumları “druz icmalarını qorumaq” məqsədi ilə əsaslandırmağa çalışıb.

Lakin Suriyadakı bir çox druz lideri xarici müdaxiləyə açıq şəkildə qarşı çıxaraq vahid Suriya dövlətinə sadiq olduqlarını vurğulayıblar.

Artan zorakılıq hadisələrinə cavab olaraq, Suriya hökuməti Süveydada dörd dəfə atəşkəs elan edib. Sonuncu razılaşma isə iyulun 19-da əldə olunub.

Xatırladaq ki, yeni Suriya keçid hökuməti keçmiş rejim lideri Bəşşar Əsədin 2024-cü il dekabrın 8-də vəzifədən uzaqlaşdırılmasından sonra ölkədə sabitliyi bərpa etməyə çalışır.