Yaponiya hökuməti ölkədə süni intellektin geniş tətbiqini nəzərdə tutan yeni plan hazırlayıb. Sənəddə süni intellekt tədqiqatlarını və yerli texnologiyaların inkişafını dəstəkləmək üçün təxminən 6,4 milyard dollar həcmində investisiya cəlb edilməsi planlaşdırılır.

Hökumət planının ilkin mərhələsində əhalinin 50 faizinin süni intellekti gündəlik həyat və iş proseslərində istifadə etməsi nəzərdə tutulur. Daha sonra bu göstəricinin 80 faizə qədər artırılması hədəflənir.

“Jiji Press” xəbər agentliyinin dekabrın 5-də yaydığı məlumata görə, təqdim edilən layihəyə əsasən, süni intellektdən istifadənin artırılması Yaponiyanın öz süni intellekt texnologiyalarının inkişafı baxımından mühüm əhəmiyyət kəsb edir.

Plan tədqiqat və inkişaf sahəsində özəl sektordan təxminən 1 trilyon yen (təxminən 6,4 milyard ABŞ dolları) həcmində vəsait cəlb olunmasını nəzərdə tutur.

Hökumət bu proqramın ilin sonuna qədər keçiriləcək Nazirlər Kabineti iclasında təsdiqlənəcəyini planlaşdırır.

Qeyd edək ki, hazırda Yaponiyada süni intellektin tətbiqi göstəricisi xeyli aşağıdır. Belə ki, ABŞ-da süni intellektdən istifadə 68,8 faiz, Çində 81,2 faiz olduğu halda Yaponiyada bu rəqəm cəmi 26,7 faiz təşkil edir.

Layihədə qeyd edilir ki, süni intellekt cəmiyyətin bütün sahələrinə inteqrasiya edilməlidir. Sənəddə bu texnologiyanın ölkənin gələcək inkişafı üçün həm intelektual məlumat bazası, həm də tətbiq platforması rolunu oynayacaq mühüm sosial infrastruktur elementi olduğu vurğulanır.