Fələstinli jurnalist Məhəmməd əl-Münəravi İsrailin Nuseyrat qaçqın düşərgəsinə endirdiyi aviazərbələr nəticəsində həlak olub. Əl-Münəravi “Fələstin” qəzetində çalışırdı.

Qəzzadakı Hökumətin Media Ofisinin məlumatına görə, Əl-Münəravinin ölümü ilə 2023-cü ilin oktyabr ayından bəri öldürülən fələstinli jurnalistlərin sayı 256-ya çatıb. Ofis İsrail ordusunun fələstinli jurnalistləri qəsdən və sistematik şəkildə hədəf almasını və öldürməsini qətiyyətlə pisləyib.

Bəyanatda beynəlxalq ictimaiyyət və media təşkilatlarına İsrailin işğal siyasətini qınamaları barədə çağırış edilib.

Fələstin rəsmiləri bildiriblər ki, İsrail ordusu 10 oktyabrdan bəri qüvvədə olan atəşkəsə baxmayaraq Qəzzaya ağır zərbələr endirib. Hücumlar nəticəsində 35-i uşaq olmaqla 100-dən çox fələstinli həlak olub.

2023-cü ilin oktyabr ayından etibarən İsrailin Qəzzaya hücumları nəticəsində əksəriyyəti qadın və uşaq olmaqla 68.500-dən çox insan həlak olub, 170.000-dən çox insan yaralanıb.