Rusiya Ukraynanın paytaxtı və Donetsk vilayətindəki şəhərləri hədəf alıb.

Ukrayna rəsmilərinin verdiyi məlumata görə, Rusiya qüvvələri Kiyev və Donetsk vilayətinin şərqində yerləşən şəhərlərə ağır zərbələr endirib. Hücumlar nəticəsində azı 5 nəfər həyatını itirib, 12 nəfər isə yaralanıb.

Səlahiyyətlilər bildiriblər ki, hücum Kiyevdə çoxmərtəbəli yaşayış binasının damında yanğına səbəb olub. Hadisə nəticəsində xəsarət alanlar barədə məlumat verilməyib. Kiyev meri Vitali Kliçko da hücumu təsdiqləyib. Yerli mediada yayımlanan görüntülərdə sakinlərin metro stansiyalarına sığındığı görünür.

Donetsk Regional Dövlət Administrasiyasının rəhbəri Vadim Filaşkinin sözlərinə görə, Rusiya bir neçə şəhəri hədəf alıb, nəticədə evlər və infrastruktur obyektləri zərər görüb. O əlavə edib ki, Rusiya qüvvələri mülki əraziləri hədəf almağa davam edir. Rəsmilər bir neçə mülki şəxsin təxliyə edildiyini də bildiriblər.

Rusiya tərəfi hələlik hücumlarla bağlı rəsmi açıqlama verməyib.

ABŞ-ın silah tədarükünü dayandırması Ukraynada narahatlıq yaradır

ABŞ-ın Ukraynaya silah, xüsusilə də hava hücumundan müdafiə sistemlərinin tədarükünü dayandırması Kiyevdə ciddi narahatlığa səbəb olub.

Donald Tramp sabiq prezident Co Baydeni – Ukraynaya həddindən artıq silah göndərməklə ABŞ-ın öz ehtiyatlarını tükətməkdə günahlandırıb.

"Bayden Ukraynaya silah göndərməklə ölkəmizin ehtiyatlarını boşaldıb. Biz öz təhlükəsizliyimizi təmin etmək üçün kifayət qədər silaha sahib olmalıyıq", – deyə Tramp qeyd edib.