Suriyanın bu mövzuya yönəlmiş üçillik strategiyası quru minaları və partlamamış hərbi sursat problemini həll etməyi hədəfləyərkən, Dəməşq rəhbərliyi Türkiyə ilə ortaq fövqəladə hallara reaksiya əməliyyat mərkəzi qurmağı planlaşdırır.
Fövqəladə Hallar və Fəlakətlərin İdarə Olunması naziri Raed əl-Saleh oktyabrın 26-da verdiyi açıqlamada Suriyanın quru minaları və müharibə qalıqları ilə mübarizəyə yönəlmiş üçillik strategiyasının bir hissəsi olaraq, ölkə daxilindəki minaların paylanmasını göstərən ilk xəritəni yaxın vaxtlarda istifadəyə verəcəyini bildirib.
ISNA xəbər agentliyinin bildirdiyinə görə, əl-Saleh deyib: "Milli Mina Fəaliyyət Mərkəzi minalanmış əraziləri aşkarlamaq və bu təhdidə qarşı aparılan işləri gücləndirmək məqsədilə sözügedən strategiyanı tətbiq edir”.
Nazir əl-Saleh mövcud çətinliklərə baxmayaraq, mülki şəxsləri qorumaq və bölgə sakinlərinin kənd təsərrüfatı torpaqlarından təhlükəsiz şəkildə istifadə edə bilmələrini təmin etmək məqsədilə mina təmizləmə planları hazırlamağa davam etdiklərini qeyd edib.
Əl-Saleh həmçinin əlavə edib ki, Suriya təcrübə mübadiləsi aparmaq və qabaqcıl mina təmizləmə texnologiyalarından yararlanmaq üçün Almaniya və Ukrayna ilə əməkdaşlıq edir.
Türkiyə ilə birgə əməliyyat mərkəzi
Əl-Saleh bununla yanaşı, Nazirliyin sərhədin hər iki tərəfindəki fövqəladə hallara reaksiya və fəlakətlərin idarə olunması işlərini koordinasiya etmək üçün Türkiyə ilə birgə əməliyyat mərkəzi qurmaq istiqamətində çalışdığını bildirib.
Sözügedən mexanizmin yanğın, sel və digər fəlakətlərə qarşı koordinasiyanı və reaksiya sürətini artırmağı hədəflədiyi ifadə edilib.
Suriya rəsmiləri Bəşər Əsəd rejiminin 2011-ci və 2024-cü illər arasında mülki şəxslərə qarşı apardığı müharibənin qalıqlarının səbəb olduğu partlayışlar nəticəsində meydana gələn ölüm və yaralanma hallarını mütəmadi olaraq xəbər verirlər.
8 dekabr 2024-cü ildə müxalif döyüşçülərin Dəməşqə daxil olaraq Əsəd rejimini devirməsi ilə nəticələnən qarşıdurmalar yüz minlərlə insanın ölümünə və ya yaralanmasına, həmçinin infrastrukturun böyük miqyasda dağılmasına səbəb olub.
Suriya rəsmiləri və Beynəlxalq Qırmızı Xaç Komitəsi kimi beynəlxalq təşkilatlar ölkənin müxtəlif bölgələrində müharibənin geridə qoyduğu minaları və partlamamış hərbi sursatları təsbit etmək istiqamətindəki fəaliyyətlərini davam etdirirlər.
Quru Minalarının Monitorinqi (Landmine Monitor) məlumatlarına görə, Suriyada 2011-ci ildən bəri partlamamış hərbi sursatlar 13 mindən çox insanın ölümünə və ya yaralanmasına səbəb olub.
