Suriya Demokratik Qüvvələri (SDQ) adı altında fəaliyyət göstərən PKK/YPG terror təşkilatı Suriyanın şimalında mülki yaşayış məntəqələrinə artilleriya zərbələri endirib.
Bu barədə yerli media orqanları məlumat yayıb.
Suriyanın SANA xəbər agentliyinin verdiyi məlumata əsasən, terror təşkilatı Hələb vilayətinin Deyr Hafir rayonunun Humeymə və Əl-Keyta kəndlərini hədəf alıb.
Suriya ordusu bu hücuma cavab olaraq PKK/YPG-yə məxsus mövqelərə zərbələr endirib.
Xatırladaq ki, martın 10-da Suriya hökuməti SDQ ilə bu qüvvələrin dövlət qurumlarına inteqrasiyasını nəzərdə tutan razılaşmaya gəlinildiyini bildirmişdi. Həmin razılaşma ölkənin ərazi bütövlüyünü vurğulayır və separatçı təşəbbüsləri rədd edirdi.
Lakin SDQ bu razılaşmanı dəfələrlə pozub.
Bəşər Əsədin 24 illik hakimiyyətinin dekabr ayında sona çatması Suriyada yeni dövrün başlamasına səbəb olub. Onun Rusiyaya qaçması ilə 1963-cü ildən bəri hakimiyyətdə olan 'Bəəs' partiyasının dövrü də rəsmən başa çatıb.
Yeni qurulan və Əhməd əl-Şəraanın rəhbərlik etdiyi müvəqqəti administrasiya isə yanvar ayında fəaliyyətə başlayıb. Hazırda ölkədə təhlükəsizlik tədbirləri gücləndirilib.
