Türkiyə Prezident Administrasiyasının Kommunikasiya İdarəsindən verilən məlumata görə, Prezident Rəcəb Tayyib Ərdoğan aprelin 16-da Şimali Kipr Türk Respublikasının (ŞKTC) Prezidenti Tufan Ərhürman ilə görüşüb. İstanbulda baş tutan görüşdə bəzi Avropa ölkələrinin İranla müharibə bəhanəsi ilə Kiprə yerləşdirdiyi hərbi ünsürlərinin daimi xarakter daşımamalı olduğu vurğulanıb.

Prezident R.T.Ərdoğan Türkiyənin Şimali Kipr Türk Respublikasının təhlükəsizliyini təmin etmək üçün bütün zəruri addımları atmağa hazır olduğunu və rəsmi Ankaranın Kiprdəki türklərin hüquq və maraqlarının pozulmasına heç vaxt icazə verməyəcəyini vurğulayıb. Görüş zamanı ikitərəfli münasibətlər və regional proseslər ətrafında da fikir mübadiləsi aparılıb.

Görüşdə Milli Kəşfiyyat Təşkilatının rəhbəri İbrahim Kalın, Türkiyə Prezidentinin xarici siyasət və təhlükəsizlik məsələləri üzrə müşaviri Akif Çağatay Kılıç, Kommunikasiya İdarəsinin rəhbəri Burhanəddin Duran və Türkiyə Prezidentinin Baş müşaviri Zəfər Çubukçu da iştirak ediblər.