Yerli rəsmilər bu gün (10 iyun 2026) Ukrayna pilotsuz uçuş aparatlarının (PUA) Rusiyanın ilhaq etdiyi Krımın Sevastopol şəhərində yerləşən tarixi bir muzeyi vurduğunu və hava hücumları səbəbindən gecə vaxtı həyata keçirilən qatar səfərlərinin sayını azaltdıqlarını açıqlayıblar.

Muzey Rusiya İmperiyası ilə Osmanlı İmperiyasının da daxil olduğu bir koalisiya arasında 1853-1856-cı illərdə baş vermiş Krım müharibəsinin xatirəsini yad edir. Rusiya bu müharibədə məğlub olmuşdu.

Sevastopolun Rusiya tərəfindən təyin edilmiş qubernatoru Mixail Razvojayev “Telegram”da verdiyi açıqlamada muzeyin damının yandığını bildirib, lakin can itkisi və ya zərər olub-olmaması barədə məlumat verməyib. Razvojayev bu gün erkən saatlarda etdiyi paylaşımda: "Düşmən bu hörmətsizliyin cavabını verəcək", -deyə qeyd edib.

Qubernator Sergey Aksyonov isə açıqlamasında bu həftə başqa bir hadisədə bir qatar sürücüsünün yaralanması və köməkçisinin həlak olmasından sonra rəsmilərin gecə saatlarındakı qatar səfərlərini azaltdığını bildirib.

2014-cü ildə Ukraynadan Rusiya tərəfindən ilhaq edilən və Qara dənizdə yerləşən yarımada olan Krım istirahət fəslinin başlaması ilə Ukraynanın son PUA hücumlarından sonra yanacaq qıtlığı ilə qarşı-qarşıyadır.

Ukrayna Prezidenti Volodimir Zelenski keçən həftə Rusiya Prezidenti Vladimir Putin ilə üz-üzə görüşmək təklifi irəli sürüb, lakin Putin bunu rədd edib. Kreml qatar hücumundan sonra Ukraynanın münaqişəyə sülh yolu ilə həll yolu tapmaq səylərinə zərbə vurduğunu bəyan edib.

Rusiyanın Samara bölgəsində dövlətin nəzarətindəki neft nəhəngi "Rosneft" tərəfindən idarə olunan bir çox neft emalı zavoduna ev sahibliyi edən, Volqa çayı üzərindəki mühüm neft mərkəzi Novokuybışevsk şəhərində isə PUA hücumlarının qarşısı alınıb.

Yerli mətbuatın yazdığına görə, rəsmilər hava hücumu xəbərdarlıqları səbəbindən ictimai nəqliyyatın fəaliyyətini dayandırarkən, bir milyon əhalisi olan Samara şəhərinin sakinlərini sığınacaqlara girməyə çağırıb.

Ukraynanın Rusiyanın enerji infrastrukturuna yönəlmiş hücumları dünyanın üçüncü ən böyük neft istehsalçısı olan Moskanı neft hasilatını azaltmağa məcbur edib.

Rusiyanın Ukrayna ilə sərhəddə yerləşən Rostov bölgəsində bir PUA-dan düşən qalıqlar mülki obyektdəki yanacaq çənində yanğına səbəb olub. Ölkənin mərkəzində yerləşən Vladimir bölgəsində isə iki sənaye müəssisəsi yanıb.

Rusiyanın uzaq neft hasilatı bölgələri olan Xantı-Mansiysk, Perm və Tümenlə yanaşı, Ukraynadan minlərlə kilometr məsafədəki Ural dağlarında yerləşən sənaye zonaları Çelyabinsk və Sverdlovsk bölgələrində yerli rəsmilər hava hücumu xəbərdarlığı veriblər.

Rusiya gecə ərzində Ukraynaya məxsus 326 PUA-nı vurduğunu açıqlayıb. Rusiya Müdafiə Nazirliyi və Moskva meri sosial media paylaşımlarında bu PUA-lardan rəsmən ən azı 10-nun paytaxt Moskvaya doğru irəlilədiyini qeyd ediblər.

"Reuters" agentliyi bu xəbərləri müstəqil olaraq təsdiqləyə bilməyib.