İndoneziyada ötən həftə baş verən torpaq sürüşməsi nəticəsində həyatını itirənlərin sayı 70 nəfərə çatıb. Qərbi Yavada itkin düşmüş 10 nəfərin tapılması istiqamətində axtarış-xilasetmə əməliyyatları davam edir. Bu barədə məlumatı "Antara News" xəbər agentliyi yayıb.

Səlahiyyətlilər yanvarın 31-də hadisə yerindən daha 10 nəfərin cəsədinin tapıldığını bildiriblər. Bandunq Axtarış və Xilasetmə Agentliyinin rəhbəri Ade Dian Permana qeyd edib ki, hazırda təxminən 10 nəfər hələ də itkin sayılır.

Permananın sözlərinə görə, bazar günü izləmə itləri və ağır texnikanın iştirakı ilə davam etdirilən axtarış əməliyyatlarına ümumilikdə 3 713 işçi cəlb olunub. İndiyədək həlak olanlardan 49 nəfərin şəxsiyyəti müəyyən edilərək ailələrinə təhvil verilib, 78 nəfər isə xilas edilib.

Xatırladaq ki, torpaq sürüşməsi ötən şənbə günü Qərbi Bandunq bölgəsindəki kəndlərdən birində baş verib və nəticədə çoxsaylı ev palçıq və dağıntılar altında qalıb.