Yanvarın 22-də NTV televiziya kanalına müsahibə verən Türkiyənin Xarici İşlər naziri Hakan Fidan İsrailin Türkiyənin Qəzzadakı roluna “hər cür şəkildə qarşı” olduğunu bildirib. Lakin o, buna baxmayaraq rəsmi Ankaranın səylərini davam etdirəcəyini qeyd edib. Nazir deyib: “Zəruri şərtlər yaranarsa, hərbi dəstək vermək iradəmiz var.”
H.Fidan Qəzzanı Türkiyənin ən vacib prioriteti kimi xarakterizə edib və bölgədə nəzarəti həyata keçirəcək yeni Sülh Şurası strukturunun yaradılması istiqamətində hazırlıqların davam etdiyini bildirib. Nazir qeyd edib ki, ayrı-ayrı komitələr Qəzzanın milli iradəsinin təmsil olunmasına və gündəlik idarəetmənin həyata keçirilməsinə cavabdeh olacaq.
Humanitar yardım fəaliyyətlərinin fasiləsiz davam etdiyini bildirən H.Fidan Rəfah sərhəd-keçid məntəqəsinin ən tez gələn həftə yenidən açıla biləcəyini söyləyib. Qış şəraitində çadırlarda yaşamağa məcbur qalan məcburi köçkün fələstinlilər üçün konteyner tipli yaşayış evlərinin göndərilməsinin planlaşdırıldığını, Türkiyə Qızıl Ayparasının isə ərazidə yardım fəaliyyətlərini davam etdirdiyini qeyd edib.
“Həmas” müqavimət hərakatının tərkisilah olub-olmayacağı ilə bağlı suala cavab verən H.Fidan bu məsələnin daha geniş yol xəritəsinin tərkib hissəsi olduğunu bildirib. Həmçinin nazir rəsmi Ankara üçün əsas prioritetin Qəzza əhalisinin öz torpaqlarında qalmasının təmin edilməsi olduğunu vurğulayıb.
İsrailin İrana mümkün hücumu
Türkiyənin XİN rəhbəri H.Fidan İsrailin hələ də İrana hücum etmək üçün fürsət axtardığını göstərən əlamətlərin mövcud olduğunu deyərək, belə bir addımın regionu daha da qeyri-sabit vəziyyətə sala biləcəyi barədə xəbərdarlıq edib.
“Ümid edirəm ki, fərqli bir yol taparlar, lakin reallıq budur ki, xüsusilə İsrail İrana hücum etmək üçün fürsət axtarır”, – deyə o, əlavə edib.
Suriyadakı toqquşmalar
Suriyadakı məsələlərə də toxunan H.Fidan YPG terror təşkilatı ilə Dəməşq rəhbərliyi arasında əldə olunan dörd günlük atəşkəsin həssas olduğunu və onun uzadılmasına ehtiyac yarana biləcəyini bildirib. O, həmçinin DEAŞ üzvlərinin Suriya ərazisindən İraqa köçürülməsinə diqqət çəkib.
Türkiyənin toqquşmaların yenidən alovlanmasının qarşısını almaq üçün aktiv diplomatik fəaliyyət apardığını bildirən H.Fidan faydalı dialoq prosesinin formalaşacağına ümid etdiklərini söyləyib. YPG-nin son dövrlərdə güc itirməsinin gözlənilən olduğunu qeyd edən nazir ərəb çoxluğun yaşadığı bölgələrdə qəbilə strukturlarının və yerli üsyan risklərinin uzun müddətdir qiymətləndirildiyini bildirib.
Nazir H.Fidan rəsmi Ankaranın YPG terror təşkilatının tam şəkildə Şimali İraq mərkəzli PKK terror təşkilatı rəhbərliyinə tabe olduğunu bir daha təkrarlayaraq, suriyalı olmayan PKK üzvlərinin Suriyanı tərk etdiyini vurğulayıb. O, Sincar bölgəsində PKK-nın mövcudluğunun davamlı olmadığını bildirib. Hakan Fidan YPG terror təşkilatına rəsmi Ankara tərəfindən verilən mesajları qulaqardına vurmamaq və xarici aktorların təsiri altına düşməmək çağırışı da edib.
Qlobal güc siyasətində “təhlükəli dövr”
Eyni zamanda daha geniş regional çərçivədə də danışan nazir H.Fidan böyük güclərin qeyri-müəyyənlik yaratdığı və qaydalara əsaslanan beynəlxalq nizamı zəiflətdiyi “təhlükəli dövr”ə qədəm qoyulduğunu bildirib. Bu səbəbdən nazir “orta miqyaslı güclər” arasında əməkdaşlığın daha böyük əhəmiyyət kəsb etdiyini vurğulayıb və prezident Rəcəb Tayyib Ərdoğanın uzun müddətdir səsləndirdiyi qlobal sistemdəki zəyifliklə bağlı fikirlərinə istinad edib.
H.Fidan Türkiyənin geniş regional ittifaqlar quraraq qütbləşməni azaltmaq mövqeyində olduğunu bildirib. O, ABŞ prezidenti Donald Trampın Qrenlandiyanı əldə etmək israrına da toxunaraq, belə bir ərazi itkisinin ittifaqların dağılmasına işarə edəcəyini deyib və Vaşinqton hökumətinin strateji hədəflərinin gizli olmadığını, lakin bunun Qərb birliyi üçün ciddi nəticələr doğura biləcəyini deyib.
