Türkiyə Respublikasının Prezidenti Rəcəb Tayyib Ərdoğan iyulun 28-də paytaxt Ankarada keçirilən 2-ci Kommunikasiya Şurasının tədbirində çıxış edib.
Prezident R.T.Ərdoğan deyib: “Əvvəlcə İsrail tərəfindən Qəzzada şəhid edilənlər olmaqla, fədakarca həyata keçirdikləri fəaliyyətləri zamanı həlak olan media mənsublarını rəhmət və ehtiramla yad edirəm”.
Dövlət başçısı günümüzdə informasiyaya çıxışın heç vaxt olmadığı qədər sürətləndiyi, asanlaşdığı və yayğınlaşdığı dinamik bir dövrdə olduğumuza diqqət çəkərək deyib: “Peyk və rabitə texnologiyalarında demək olar ki, hər gün yeni bir irəliləyiş, yeni bir inkişaf qeydə alınır. Dünyanın bir ucunda baş verən hər hansı bir hadisə dəqiqələr, hətta saniyələr ərzində milyardlarla insana çatır. Əvvəllər saatlarımızı, günlərimizi, həftələrimizi alan işlər artıq dəqiqələr ərzində, tək bir düymə və ya tapşırıqla həll olunur”.
Xüsusilə süni intellekt modellərinin dövrəyə girməsi ilə təhsildən mediaya, nəqliyyatdan ticarətə, səhiyyədən kənd təsərrüfatına qədər hər sahədə bu texnologiyaların təmin etdiyi üstünlüklərdən yararlanıldığını vurğulayan ölkə başçısı R.T.Ərdoğan çıxışına belə davam edib: “Kütlələr (alqoritm faşizmi) adlandırılan bir çərçivəyə sıxışdırılmağa çalışılır. Bu prosesdə ən çox zərər görən anlayış isə şübhəsiz ki, həqiqət olur. Halbuki kommunikasiyanın əsas məqsədi doğru və etibarlı məlumatı oxuyucuya ən qısa yoldan və ən qısa müddətdə çatdırmaqdır”.
Dövlət başçısı keçirilən tədbirin əhəmiyyətini belə ifadə edib: “Dövlət diplomatiyasından süni intellektə, dezinformasiya ilə mübarizədən xəbərçilik istehsalına, kommunikasiya hüququ və rəqəmsal platformalar kimi kommunikasiya sahəsindəki bütün mövzuların nəzərdən keçirildiyi bu tədbiri son dərəcə qiymətli hesab etdiyimi burada vurğulamaq istəyirəm”.
Prezident R.T.Ərdoğan çıxışını yekunlaşdırarkən deyib: “Şuranın həm zəngin iştirakçı heyəti, həm də əhatəli məzmunu ilə əksikliyini hiss etdiyimiz bir sahədə mühüm bir boşluğu dolduracağına ürəkdən inanıram. Buradakı ortaq təfəkkürün məhsulu olan hesabatlar, məruzələr və sabah yayımlanacaq yekun bəyannaməsi, ümid edirəm ki, Türkiyənin gələcək baxışını formalaşdıracaq. Bu sənədlər ölkəmizin milli və beynəlxalq kommunikasiya potensialını daha da gücləndirəcəkdir”.
