Türkiyə təhlükəsizlik mənbələrinin verdiyi məlumata görə, Milli Kəşfiyyat Təşkilatının (MKT) rəhbəri İbrahim Kalın “Həmas” müqavimət hərəkatı siyasi bürosunun rəhbəri Xəlil əl-Həyya və onu müşayiət edən “Həmas” nümayəndə heyəti ilə Qəzzadakı vəziyyəti müzakirə etmək üçün görüş keçirib.
Martın 31-də Ankara şəhərində keçirilən görüşdə İsrailin Qəzzada davam edən hücumları və dərinləşən humanitar böhran, eləcə də işğal altındakı İordan çayının qərb sahilində qeyri-qanuni israilli köçkünlərin zorakılığı və Qüdsdəki “Məscidül-Əqsa” məscidinə yönəlik məhdudiyyətlər müzakirə olunub.
Rəsmilər İsrailin Qəzza sülh planının birinci mərhələsi çərçivəsində öhdəliklərini yerinə yetirməsinin vacibliyini vurğulayıb, eyni zamanda ikinci mərhələyə keçid üçün atılmalı olan addımları ətraflı şəkildə nəzərdən keçiriblər.
Qeyd edilir ki, “Həmas” nümayəndə heyəti Türkiyənin Qəzzada sülhün təmin olunması istiqamətində indiyədək göstərdiyi səylərə görə Türkiyə Prezidenti Rəcəb Tayyib Ərdoğana təşəkkürlərini çatdırıb.
Bundan əlavə, “Həmas” nümayəndə heyəti həmçinin Türkiyənin xarici işlər naziri Hakan Fidan ilə də görüş keçirib.
