ABŞ rəsmiləri potensial qarşıdurmaların qarşısını almaq üçün qoşunların İsrail ordusu ilə koordinasiyada birgə nəzarət mərkəzi yaradacağını və Qəzzada fəaliyyət göstərən digər təhlükəsizlik qüvvələrini birləşdirəcəyini açıqlayıb.

ABŞ-ın iki yüksək rütbəli rəsmisi bildirib ki, ABŞ Qəzzada sabitlik üçün təşkil edilən birgə əməliyyat qrupunun bir hissəsi olaraq 200 əsgər yerləşdirəcək, lakin heç bir Amerika əsgəri Qəzzada sahədə olmayacaq.

Rəsmilər oktyabrın 9-da jurnalistlərə verdikləri açıqlamada bu 200 əsgərin əməliyyat qrupunun əsasını təşkil edəcəyini və komandaya Misir, Qətər, Türkiyə və ola bilsin ki, Birləşmiş Ərəb Əmirliklərinin nümayəndələrinin də daxil olacağını bildiriblər.

Rəsmilər həmçinin ABŞ əsgərlərinin dəqiq yerinin hələ müəyyən edilmədiyini, lakin birgə nəzarət mərkəzinin yaradılacağını və potensial toqquşmaların qarşısını almaq üçün Qəzzada fəaliyyət göstərən digər təhlükəsizlik qüvvələrinin İsrail qüvvələri ilə koordinasiyalı şəkildə inteqrasiya olunacağını bildiriblər və əlavə ediblər ki, Amerika hərbçilərinin Qəzzaya daxil olması planlaşdırılmır”.

Amerika rəsmiləri sazişin qüvvəyə minməsinin bölgədəki gərginliyi azaldacağına və İsrail ilə ərəb ölkələri arasında yeni normallaşma sazişlərinə yol açacağına ümid etdiyini vurğulayıblar.

Xatırladaq ki, ABŞ prezidenti Donald Tramp ilk səlahiyyət müddətində İsrail ilə Bəhreyn, Birləşmiş Ərəb Əmirlikləri, Mərakeş və Sudan arasında imzalanmış İbrahim sazişinin memarı olub.