İnsan Hüquqları, Azadlıqları və Humanitar Yardım Vəqfi (İHH) İsrailin amansız hücumlarının səbəb olduğu genişmiqyaslı dağıntılardan sonra Qəzzada yeni layihəyə start verib.

Oktyabrın 18-də başlayan təşəbbüs əsasən dağıntıların təmizlənməsi, ətraf mühitin bərpası və bağlı yolların yenidən açılmasına yönəlib. İHH-nin məlumatına görə, təmizləmə işləri xüsusilə Qəzzanın ən çox zərər görmüş şimal hissəsində həyata keçirilir.

Ağır texnika və ixtisaslı qruplar yaşayış məntəqələrindəki dağıntıların təmizlənməsi üçün səfərbər olunub. Bununla da küçələrin və ictimai yerlərin ən qısa zamanda yenidən istifadəyə açılması hədəflənir.

İHH bildirib ki, burada həyata keçirilən fəaliyyətlər həm də Qəzza sakinləri üçün normal həyata qayıtmaq üçün təhlükəsizlik hissinin yenidən formalaşdırılmasını nəzərdə tutur. Bundan əlava, qurum yolların açılmasının humanitar yardımların çatdırılması, ərzaq, tibbi ləvazimatlar və digər təcili ehtiyacların uzun müddətdir məhrum qalmış əhaliyə göndərilməsi baxımından həyati əhəmiyyət kəsb etdiyini vurğulayıb.

Qeyd edək ki, İHH uzun illərdir Qəzzada ərzaq paylanması, sığınacaq təminatı, səhiyyə xidmətləri, psixososial dəstək proqramları sahəsində yardımlar göstərir. Müharibənin səbəb olduğu dağıntıların təmizlənməsi və yolların açılması layihəsi ilə isə Fond Qəzzanın şəhər mühitinin bərpasını sürətləndirməyi və minlərlə fələstinlinin həyat şəraitinin yaxşılaşdırılmasına töhfə verməyi qarşısına məqsəd qoyub.