Ermənistanın Baş naziri Nikol Paşinyan ölkəsindəki Rusiya hərbi bazasının təhlükəsizlik baxımından heç bir əhəmiyyət daşımadığını və buna ehtiyac duymadıqlarını bildirib.
Gümrü şəhərində yerləşən 102-ci Rusiya Hərbi Bazası ilə bağlı mətbuat konfransında çıxış edən Paşinyan məsələnin məhz Rusiya tərəfindən qaldırıldığını diqqətə çatdırıb:
"Rusiya bizim dostumuzdur, lakin hərbi baza Ermənistanın təhlükəsizliyi üçün vacib deyil və bizə lazım deyil. Əgər bazanı köçürmək istəyirlərsə, ən qısa zamanda köçürə bilərlər. Amma qalmasını istəyirlərsə, Ermənistan bu məsələni müzakirə etməyə hazırdır".
Qeyd edək ki, Rusiyanın Cənubi Qafqazdakı əsas hərbi aktivlərindən biri olan 102-ci hərbi baza 1995-ci ildə imzalanmış müqavilə əsasında fəaliyyət göstərir. Quru qoşunları bölmələri ilə yanaşı, bazada hava hücumundan müdafiə sistemləri və qırıcı təyyarələr də yerləşir.
